Vlorë, Denaj: Në mbështetje të eksporteve shqiptare vendase dhe të huaja

Ministrja e Financave dhe Ekonomisë, Anila Denaj, ka vizituar një sipërmarrje vendase në Qarkun e Vlorës, që eksporton produkte peshku në vendet e Bashkimit Europian.

“Ne duam të nxisim eksportet, si ato të menaxhuara nga shqiptarët, por edhe të kemi mundësi për ta zgjeruar dhe për të huajt, e rëndësishme është që të mundësojmë sa më shumë punësim” -u shpreh Ministrja.

Megjithatë, heqja nga Bashkimi Europian i kuotave të eksporteve shqiptare për disa lloje peshku ka bërë që të rritet niveli i këtyre produkteve. Këtë e pohojnë vetë sipërmarrësit të cilët eksportojnë drejt tregjeve europiane.

“Kjo ka ndikuar 100 %. Tregu europian ka nevojë për këtë produkt dhe aq më tepër që është produkt cilësor. Ne e kemi mësuar këtë dhe po rritemi. Biznesi im është rritur në sajë edhe të mbështetjes së BE-së, duke parë që për tregun vendas ne e kemi plotësuar nevojën, jo vetëm unë por të gjithë prodhuesit shqiptarë” –tha sipërmarrësi Muharrem Jazaj.

Denaj informoi në lidhje me zhvillimin e këtij sektori se tashmë funksionojnë disa skema mbështetëse.

“Qeveria shqiptare është e angazhuar edhe në skema të drejtpërdrejta vetëm të fondeve nacionale që i menaxhon me AZHBR, por edhe në skemat e mbështetjes të fondeve të garancisë. Unë dua ta lançoj që këto skema mbështetëse ekzistojnë sot. Janë dy skema mbështetëse nga dy donatorë shumë të rëndësishëm në Shqipëri, BERZH dhe KfW, të cilat kanë hyrë në skema mbështetëse në bujqësi me sektorin financiar” -tha ministrja.

Gjithashtu, Denaj vizitoi një nga bizneset që tashmë ka përfituar nga fondet e AZHBR-së. Sipërmarrja në fjalë ka përfituar 20 milionë lekë, ndërkohë që e gjithë vlera përfundimtare e këtij investimi do të arrijë në mbi 40 milionë lekë. Mendohet se kapaciteti përpunues i këtij biznesi do të arrijë në 4 mijë ton peshk dhe numri i të punësuarve të jetë mbi 80 persona.

Eksportet shqiptare kanë njohur rritje gjatë viteve të fundit. Vetëm për vitin 2018 në total llogaritet të jenë 310 344 milion lekë, ndërsa 2 mujori i parë i këtij viti llogaritet në vlerën 44 475 milion lekë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.