Vlorë, nis Kampionati Botëror i Fluturimeve të Lira. 150 pilotë nga 28 shtete, pjesëmarrës në garë

Për herë të parë në historinë e vendit tonë, Shqipëria është vendi organizator dhe mikpritës i Kampionatit Botëror të Fluturimeve, ku rreth 150 pilotë nga 28 shtete të ndryshme të botës janë të pranishëm për të ushtruar këtë sport aventure.

I pranishëm në çeljen e këtij aktiviteti, ministri Damian Gjiknuri shprehu falenderimet për organizatorët që zgjodhën Vlorën për këtë event . “ Vlora është një qytet i mrekullueshëm! Më parë thonin se është një qytet i bukur kur shikohet nga lart, por ky qytet bëhet i bukur edhe kur prek tokën. Megjithatë, sot ky qytet është i bukur, pasi bën së bashku dy dimensionet tokë dhe ajër. Kjo është një ngjarje fantastike, që i jep Vlorës një tjetër dimension në turizëm. Sigurisht ky qytet e meriton!”.

Nga ana e saj ministrja e Kulturës, Mirela Kumbaro u shpreh: “Faleminderit Alket dhe Renis! I kemi dhënë fjalën njeri-tjetrit që do të ishim bashkë në këtë fluturim. Ne e nisëm këtë rrugëtim në Gjirokastër, për të mbërritur në Vlorë, si dy nga vendet më të bukura për të fluturuar. Sot jemi në Vlorë, ndërkohë mbrëmë Tirana u kthye në një skenë të hapur të Mesdheut, atje kishte shumë artistë, këtu ka plot sportistë! Dua të them se Shqipëria është një vend i hapur për të gjithë, e bëjnë të veçantë sporti dhe kultura!”, u shpreh Kumbaro.

Presidenti i Federatës shqiptare të Aeronautikës, Renis Tërshana, gjatë fjalës së tij përshëndetëse në këtë event pohoi:  “Është një nga ditët më të lumtura në jetën time. Shoh shumë sportistë nga shumë vende të botës, që ndihen mire këtu në Vlorë. Uroj që përveç garës, kompeticionit dhe frymës sportive, ta gëzojmë sa më shume këtë qytet. I falenderoj të gjithë mbështetësit dhe ju uroj suksese” , tha Presidenti i Federatës shqiptare të Aeronautikës.

Të shumta kanë qenë reagimet në rrjetet sociale për këtë event, ku janë shprehur vlerësime për këtë organizim, ku ndër të tjera i shërben promovimit të turizmit dhe kulturës shqiptare.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.