Vonesat e avionëve, Aviacioni Civil: 55% e ankesave të pasagjerëve s’janë pranuar

Pavarësisht se ka një rritje të numrit të kompensimeve për vonesat apo anulimet e fluturimeve nga aeroporti ndërkombëtar “Nënë Tereza”, të dhënat e Autoritetit të Aviacionit Civil tregojë se 55% e ankesave të ardhura nga pasagjerë që kanë hasur probleme në udhëtimin e tyre nuk janë pranuar.

Sipas këtij dikasteri, gjatë këtij viti janë kryer 700 kompensime me nga 250 euro ose me bileta avioni, ndërkohë që rezulton se 200 kompensime u kryen gjatë nëntorit. Sipas të dhënave rezulton se kompania që ka numrin më të lartë të kompensimeve është Blue Panorama, me 509 kompensime në total. Pas saj renditet FLY ERNEST, me 96 kompensime, ndërkohë kjo kompani duke shfrytëzuar edhe legjislacionin europian nuk ju është përgjigjur ende pasagjerëve që kanë regjistruar probleme gjatë stinës së verës dhe vjeshtës.

Për këtë çështje, Autoriteti i Aviacionit Civil shqiptar ka vënë në dijeni edhe Autoritetin e Aviacionit Civil në Itali dhe Komisionin Europian, që janë duke e ndjekur situatën. Ndërkaq, kompania Albawings ka pranuar në total 31 ankesa, ndërkohë që sapo ka filluar të trajtojë edhe ankesat e stinës së vjeshtës.

Këto kanë qenë 3 kompanitë më problematike gjatë muajve të verës në drejtim të vonesave apo anulimeve të fluturimeve, por për muajin nëntor, situata nuk paraqitet problematike. Sipas Aviacionit Civil korrektësia në fluturime vjen për shkak të uljes së fluksit të udhëtarëve jo vetëm në Shqipëri por edhe në vendet e tjera Europiane.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.