Votë për lidershipin në Britani – May: Lideri i ri nuk do ketë kohë të rinegociojë Brexit

Kryeministrja e Britanisë Theresa May,  tha se do të luftojë për lidershipin e saj dhe shtoi se nëse ndodh ndonjë ndryshim në këto momente, do të vononte divorcin e Britanisë me Bashkimin Europian.

Ndërkohë që vetëm 4 muaj kanë mbetur deri sa Britania të dalë më 29 Mars,  mënyra se si do të ndodhë Brexit është ende e pasigurt, pasi marrëveshja e divorcit dështoi të kalojë në parlamentin britanik.

Në një fjalim në Downing Street, pak orë përpara se të lajmërohet një votëbesim për lidershipin e saj, May tha se do të luftojë për vendin e saj të punës me të gjithë forcat.   Duke paralajmëruar kundërshtarët në partinë e saj, May tha se nëse ata e hedhin poshtë, atëherë Brexit do të vonohet dhe me shumë gjasa mund të mos ndodhë.

 “Graham Brady ka konfirmuar se ka marrë 48 letra nga deputetët e partisë konservatore, kështu që do të ketë një votëbesim për lidershipin. Një lider i ri do të vinte në detyrë në 21 Janar që është afati ligjor, kështu që zgjedhja e një lideri të ri rrezikon t’ia kalojë kontrollin e negociatave të Brexit opozitës.  Lideri i ri nuk do të ketë kohë që të rinegociojë marrëveshjen e divorcit dhe ta kalojë në parlament deri më 29 Mars.  Kështu që me shumë gjasa do të vonohej ose ndalohej Brexit.” – deklaroi May.

Graham Brady, kryetari i “komisionit të 1922”  të partisë konservatore, tha se kufiri prej 15% në kërkesën e një votëbesimi është arritur. May mund të lë detyrën nëse 158 nga 315 deputetë votojnë kundër saj.  Brexit është vendimi më i rëndësishëm ekonomik dhe politik i Britanisë që prej luftës së dytë botërore.

Rezultati do të riformojë ekonominë prej 2.8 trilionë dollarë, do të ketë pasoja në unitetin e Mbretërisë së Bashkuar dhe do të rrezikojë  rolin e Londrës si qendra kryesore financiare në botë. Paundi britanik ka humbur 25 cent që prej referendumit të 2016-ës dhe qëndroi në 1.25 kundër dollarit kur u lajmërua votimi.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.