Votimi i paketës fiskale, Buxhuku: Falimentojnë 200 kompani të plastikës, 8 mijë të papunë

Të hënën e tre dhjetorit pritet që të votohet në parlament paketa fiskale e 2019, pas ndryshimeve dhe propozimeve që janë bërë nga komisionet përkatëse. Por në Kuvend është depozituar një kërkesë zyrtare nga administrator i Konfindustria, Gjergj Buxhuku, ku kërkohet që të mos miratohen aktet ligjore që lidhen me kompanitë e prodhimit të plastikës në vend, si dhe taksimin që është vendosur për herë të parë për disa pajisje bujqësore.

Në kërkesë argumentohet se në një kohë shumë të shkurtër do të falimentojë e gjithë industria shqiptare e prodhimit të plastikës, me përfitim të drejtpërdrejtë të kompanive importuese të Greqisë dhe Serbisë. Goditje të rëndë do të kenë edhe fermerët me taksimin për herë të parë të një grupi të madh pajisjesh bujqësore.

Miratimi nga Kuvendi i Shqipërisë i aktit ligjor në fjalë, pjesë e Paketës Fiskale 2019, sjell goditjen duke filluar nga 1 janari 2019 të afër 200 kompanive të prodhimit të plastikës me pasoja: – shkatërrimin e mbi 240 milionë euro investime të kryera, – kalimin si të papunë deri 8 mijë punëtorë të lidhur drejtpërdrejt ose tërthorazi si dhe – cenimin e rëndë të konkurrencës brenda një numri të madh sektorësh të tjerë industrialë si të prodhimit të ujit, qumështit, lëngjeve, etj.

Vlerësohet, se një treg me qarkullim vjetor deri në 100 milionë euro në vit rrezikon të shkatërrohet pa kthim dhe paratë e shqiptarëve do të shkojnë drejt konkurrentëve rajonalë në Greqi dhe Serbi.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.