Votimi i Vettingut – Rama dhe Basha vlerësojnë këtë moment historik

Një ditë pas votimit të Vettingut nga Parlamenti kreu i qeverisë Rama është shprehur se tashmë ka nisur Reforma në Drejtësi.

Nga Manza e Durrësit,  në një takim me banorët Kryeministri Rama u shpreh se do të pastrohet pallati i drejtësisë nga të korruptuarit si dhe do të merret ndëshkimi i duhur për politikanët që kanë bërë zullume.

Edhe pse Rama e ka cilësuar si një moment historik votimin e Vettingut është shprehur se pavarësisht marrëveshjes PD vazhdon të mbetet rrezik për vendin.

Më një status në Facebook ka reaguar edhe kreu i opozitës Basha për votimin e Vetttingut. Basha e ka cilësuar si një hap të rëndësishme drejt zgjedhjeve të lira dhe Republikës së Re.

Kuvendi shpalli ligjërisht krim serioz çdo lloj përpjekjeje apo veprimi që kufizon apo cenon vullnetin e lirë dhe votën e lirë të qytetarëve.

Dënime të rënda i presin tani, matrapazët e zinj të blerjes së votës, kriminelët e rrugës dhe ata në poste shtetërore që kërcënojnë apo detyrojnë me forcë qytetarët të votojnë kundër vullnetit të tyre, komisionerët, numëruesit dhe punonjësit zgjedhorë që manipulojnë votimin dhe numërimin e votave.

Policët dhe ushtarakët të cilët në vend që të mbrojnë të drejtat e qytetarëve dhunojnë të drejtën e shenjtë të votës, punonjësit e shtetit që paratë dhe pasuritë që u takojnë qytetarëve i vënë në shërbim të partisë.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.