Votohet ligji i ri për emigrantët – Gjermania, nevojë për 1.2 mln emigrantë, lehtëson procesin e punësimit

Gjermanisë i mungojnë rreth 1,2 milionë punëtorë dhe kjo i ka kushtuar ekonomisë gjermane rreth 30 miliardë dollarë. Nga ana tjetër, gjysmë milionë të papunët aktualë në Gjermani nuk kanë kualifikimin e nevojshëm.

Ky boshllëk i madh në kërkesën për punë detyroi qeverinë gjermane, që të miratonte të mërkurën ligjin e ri për punësimin e emigrantëve. Ky ligj i ri synon të tërheqë punëtorë nga vendet që nuk janë pjesë e Bashkimit Europian duke ua bërë atyre më të thjeshtë procesin e punësimit.

Të interesuarit kanë tashmë mundësinë të qëndrojnë në Gjermani për gjashtë muaj dhe gjatë kësaj kohe mund të kërkojnë një punë. Kriteret e vetme që duhet të plotësojnë janë njohuritë e gjuhës gjermane dhe mundësia për të financuar qëndrimin gjatë periudhës 6-mujore.

Një tjetër ligj që u votua ditën e djeshme ishte dhe ai që lidhet me 180,000 emigrantët të cilëve iu është refuzuar leja për azil, por punuar për më shumë se 18 muaj në Gjermani. Këta persona nuk do të deportohen, por do tu jepet mundësia që të marrin një leje për punë me afat 30 muaj.

Nëse leja e punës skadon, por niveli i gjuhës gjermane gjatë kësaj kohe është përmirësuar, ata mund të përfitojnë lejen e qëndrimit. Ndonëse duket absurde, por faktorët që e kanë sjellë Gjermaninë në këtë pikë janë rritja ekonomike, niveli i ulët i papunësisë dhe rënia e numrit të lindjeve.

Ekonomisë më të madhe të Europës i mungojnë hidraulikë, elektrikë, zdruktharë madje edhe shoferë. Por, pavarësisht mbulimit të nevojave për bizneset gjermane, ky ligj ka gjithashtu dhe disavantazhe. Disa prej partnerëve të qeverisë si dhe kundërshtarët politikë të CDU-së i frikësohen një krize të re refugjatësh si ajo e vitit 2015.

Ergisa Bejkollari/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.