Wall Street rritet ndjeshëm – Fauci: Omicron tani është më pak i frikshëm!
Një seancë padyshim pozitive dje në Wall Street, pas rënieve të mprehta të javës së kaluar për shkak të frikës nga Omicron. Varianti i ri i koronavirusit, tani, është më pak i frikshëm sipas Anthony Fauci, këshilltarit kryesor të Shtëpisë së Bardhë i cili tha se “ka shenja inkurajuese për simptomat e variantit Omicron dhe ashpërsinë e sëmundjes”.
Investitorët presin vendimet e ardhshme të Rezervës Federale: javën e kaluar, Presidenti Jerome Powell theksoi se fokusi mbetet tek inflacioni, edhe pas zbulimit të variantit të ri të koronavirusit. Për këtë arsye, ka të ngjarë që banka qendrore e SHBA-së të vendosë të përshpejtojë zvogëlimin, duke i dhënë fund ndihmës – përmes blerjes së obligacioneve me vlerë 120 miliardë dollarë në muaj – para qershorit, me një ulje prej 30 miliardë dhe jo më shumë prej 15 miliardë dollarësh në muaj.
Edhe fillimi i rritjes së normave të interesit së shpejti mund të vihet në pikëpyetje. Të premten, u publikuan të dhëna zhgënjyese për tregun e punës: vetëm 210,000 vende të reja pune u krijuan në sektorin jo-bujqësor në nëntor, ndërsa analistët kishin pritur më shumë se dyfishin e rritjes. Megjithatë, shkalla e papunësisë ra në 4.2% nga 4.6%.
Dje, axhenda makroekonomike ishte bosh, në një javë jo të mbushur me ngjarje në tërësi; Pritja do të jetë mbi të gjitha për çmimet e konsumit, të cilat do të publikohen të premten. Dow Jones Industrial Average fitoi 646,95 pikë (+ 1,9%) dhe u mbyll në 35,227,03, i nxitur nga fitimet e forta nga UnitedHealth Group (+ 2,4%), Goldman Sachs Group (+ 1,72%), Home Depot Inc. (+ 1,93%) dhe Boeing Co (+ 3,72%).
Ky ishte fitimi më i madh, për sa i përket pikëve, që nga 9 nëntori 2020 dhe fitimi më i madh në përqindje që nga 1 marsi 2021. S&P 500 u mbyll me 53,24 pikë (+ 1,2%) në 4,591,27; Nasdaq Composite përfundoi me 139,68 pikë (+ 0,9%) në 15,225,15, në një ditë në të cilën ai gjithashtu kishte rënë deri në 14,931,61.
Pas rënieve të forta javën e kaluar, indeksi i biznesit të vogël, Russell 2000, gjithashtu u rikuperua, duke fituar 44.17 pikë (+ 2.1%) dhe duke u mbyllur në 2203.48. Pas rënies së javës së kaluar për shkak të frikës nga Omicron, yield-i i obligacioneve 10-vjeçare të thesarit u rrit me 9.1 pikë bazë në 1.433%, rritja më e madhe ditore në mbi 3 javë.
Ice U.S. Indeksi i dollarit, indeksi i vlerës së monedhës së gjelbër në raport me një shportë prej 6 valutash, u rrit me 0.2%, ku euro ra me 0.27% në 1.1281 dollarë. Nafta WTI fitoi 3,23 dollarë në Nymex, 4,9% dhe u mbyll me 69,49 dollarë për fuçi, falë lajmeve pozitive për variantin e koronavirusit dhe vendimit të Arabisë Saudite për të rritur çmimin e naftës së papërpunuar të shitur në Azi dhe Shtetet e Bashkuara; WTI është kthyer nga 6 rënie të njëpasnjëshme javore. Ari humbi 4,40 dollarë, rreth 0,3%, dhe u mbyll me 1,779,50 dollarë për ons.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.