“Work in progress” në Shirokë-Fondi Shqiptar i Zhvillimit publikon ecurinë e punimeve për sheshin e ri 20 mijë metra katrorë (FOTOT)

Fondi Shqiptar i Zhvillimit informon lidhur me ecurinë e punimeve për rikualifikimin urban të qendrës së Shirokës në Shkodër. FSHZH bën të ditur se janë realizuar 40% e punimeve  dhe se aktualisht po punohet me shtrimin e pllakave dekorative (mozaikut) në sheshin kryesor.

Ky projekt përfshin gjithashtu restaurimin e 2000 m2 fasadave, ndërtimin e 1500 m2 çati të reja si dhe ndërtimin e një hapësire, prej 1700 m2 parking publik.

“Do të vijojnë punimet për; ndërtimin e rrjetit të ujësjellësit dhe kanalizimeve, ndriçimin publik, gjelbërimin, sinjalistikën, si dhe mobilimin urban të zonës. Hapësira e trajtuar për rikonstruksionin e sheshit është 20.000 m2 në total dhe paralelisht me të po punohet, për strukturën e platformës së liqenit dhe zonën e piknikut pranë saj” njofton FSHZH.

Rikonstruksioni i sheshit të Shirokës është një investim që pritet të integrohet me projektin e plotë “Për Rikualifikimin e Bregut Perëndimor të liqenit të Shkodrës”.

Me financim të qeverisë shqiptare, synimi është kthimi i Shirokës në një qendër turistike, argëtuese dhe të pasur në aktivitete sociale, në shërbim të komunitetit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.