Xhepa në “Argument”: “Deeuroizimi”, investitorët mund të gjejnë alternativa jashtë vendit se kanë risk zero nga kursi i këmbimit
Eksperti i ekonomisë Selami Xhepa shprehet se masat për rritjen e ndikimit të monedhës vendase në ekonominë shqiptare mund të sjellin një tkurrje të tregut financiar dhye investitorët të gjejnë alternativa investimi jashtë vendit. I ftuar në emisionin “Argument” të gazetarit Enio Civici, Xhepa tha se mund të ketë shumë investitorë të brendshëm që kanë interes të marrin kredi në euro për shkak se edhe qarkullimin e tyre e kanë në këtë monedhë.
S.Xhepa: Banka e Shqipërisë duhet të shikojë në atë që vërtetë si mund ta zhvillojë sistemin financiar, jo si mund ta tkurrë. Se unë mendoj që kështu tkurret tregu financiar.
E.Civici:Sa kohë që vendosen masa kontrolli?
S.Xhepa: Sigurisht, se sa më shumë që të rrisësh rixhiditetin ndaj alternativave të investimit në euro aq më shumë investitorët, bankat si pjesë e sistemit financiar, do të gjejnë alternativa jashtë vendit sepse atje e kanë riskun zero sa i takon, në rastin konkret, riskut të kursit të këmbimit. Ndërkohë që mund të ketë investitorë të brendshëm të cilët kanë shumë interes që ta marrin kredinë në euro. Pse? Sepse i kanë pagesat me jashtë vendit dhe pagesat me jashtë vendit i bëjnë me euro. Dhe për rrjedhojë, rreziku i kursit të këmbimit në raste të tilla është zero nëse këto, edhe të ardhurat i sigurojnë në euro edhe pagesat i bëjnë në euro
E.Civici:Ndërkohë që shqiptarët që paguajnë në lekë janë gjithsesi në rregull pavarësisht ndërhyrjeve apo jo të Bankës së Shqipërisë?
S.Xhepa: Pa asnjë dyshim. Nuk u ndryshon asgjë. Që përkundrazi kjo nuk bën asgjë tjetër përveçse rrit kostot e normës së interesit për çdo lloj kredie që u jepet subjekteve vendase në monedhën euro apo në dollarë. Çdo lloj rregullimi i tepruar, siç ishte në rastin konkret.
Gjatë këtij viti është planifikuar zbatimi i një plani masash për deeuroizimin dhe rritjen e ndikimit të monedhës vendase në ekonominë shqiptare. Euroizimi (ekspozimi i madh në euro) nga ana e sistemit financiar dhe bankar, ka efekt në stabilitetin e sistemit financiar, duke qenë se një pjesë e madhe e kredisë është në euro. Pasja e të ardhurave në monedhën vendase ndërsa kredia është në euro i ekspozon kredimarrësit në në riskun e kursit të këmbimit që ndikon më tej në performancën e kredisë e më pas krijon një efekt zinxhir në ekonomi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.