Xiaomi do të listohet në bursë – Pritet të jetë oferta fillestare publike më e madhe në teknologji në 2018
Prodhuesi kinez i smartphoneve, Xiaomi, ka kërkuar përgatitjen e bankave javën që vjen, për një ofertë fillestare publike në 2018-ën. Xiaomi vlerësohej në 46 miliardë dollarë në vitin 2014, përpara se ritmi i shitjeve të ngadalësohej.
Së fundmi, firma ka projektuar se pritshmëritë për vlerën në treg do të rriten, prej rezultatit të fortë këtë vit. Listimi në bursë i Xiaomi mund të sjellë ofertën fillestare publike më të madhe në sektorin e teknologjisë vitin që vjen, tregojnë burimet për Reuters.
Startup-i më me vlerë në botë për 2014-ën për një kohë të shkurtër, vlerësohej në 55 miliardë dollarë. Prodhuesi kinez pati ngecje të shitjeve në vitin 2016, pasi u përpoq të zgjerohej në të gjithë botën duke luftuar me konkurrentë të fortë brenda vendit si Huawei dhe Vivo.
Në atë kohë, kompania u tërhoq nga disa tregje jashtë vendit si Brazili dhe Indonezia, megjithatë këtë vit, ka rinisur shitje në shumë vende përfshirë Indonezinë, Vietnamin, Rusinë, Emiratet e Bashkuara Arabe dhe Ukrainë.
Xiaomi i ka zënë vendin Apple duke u kthyer në shitësin e katërt më të madh në Kinë. Themeluesi i firmës, Lei Jun, ka thënë se nuk do të bëhet publike deri në vitin 2025, megjithatë optimizmi në tregun e aksioneve dhe rezultatet premtuese financiare kanë përshpejtuar planin për t’u listuar në bursë.
Xiaomi pritet të zgjedhë Hong Kong-un ose Shtetet e Bashkuara për vendin e listimit, tregojnë burimet për Reuters.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.