YouTube ‘vetëofrohet’ të paguajë deri në 200 milionë dollarë për shkeljen e privatësisë së të miturve

Shkeljet e privatësisë po bëhen një problem çdo herë e më i madh për platformat e mëdha digjitale. Pas faljeve të Apple që ka pranuar se nuk ka qenë në lartësinë e duhur për sa i përket mbrojtjes së privatësisë, Google është ofruar të paguajë  150 deri në 200 milionë dollarë për të mbyllur gjyqin me autoritetet amerikane për  shkeljen e privatësisë së fëmijëve në kanalin YouTube.

Në 2015, Google, që ka në pronësi dhe YouTube, ka shkelur Ligjin për Mbrojtjen e Intimitetit të Fëmijëve në internet, ligji që ndalon gjurmimin e përdoruesve nën moshën 13 vjeç. Në 2017, më shumë se 20 grupe dhe organizata që mbrojnë fëmijët dhe privatësinë e tyre paraqitën ankesë tek Komisioni Federal i Tregtisë, pasi pretenduan se Google, qëllimisht, kishte mbledhur të dhënat e fëmijëve nën 13 vjeç, e nëpërmjet YouTube Kids ju shfaqte atyre reklama të dedikuara.

Marrëveshja, sipas raportit të mediave amerikane, është miratuar nga Komisioni Federal i Tregtisë me tre vota pro dhe dy kundër dhe tani do të duhet të ekzaminohet nga Departamenti i Drejtësisë. Akuzat janë për përdorim të të dhënave personale të të miturve për publicitet komercial. pa konsensusin e prindërve dhe pritet vendimi nëse do të pranohet ‘oferta e shfajësimit’ nga Google.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.