Zaganjori kalon Vetting-un – Komisioni konfirmon në detyrë kreun e Gjykatës së Lartë

Komisioni i Pavarur i Kualifikimit ka konfirmuar në detyrë Kreun e Gjykatës së Lartë, Xhezair Zaganjori. Ai ka kaluar me sukses testin e Vetting-ut për të tre komponentët, të pasurisë, të integritetit personal dhe profesional.

Ndërsa në seancën dëgjimore u paraqit personalisht për t’iu përgjigjur pyetjeve të Komisionit, Zaganjori nuk ka qenë i pranishëm gjatë dhënies së vendimit për konfirmimin në detyrë. Gjatë seancës dëgjimore atij i është dashur t’i japë përgjigje rreth 20 pikëpyetjeve mbi pronat, depozitat e llogaritë bankare të vetat e të familjarëve, investime në obligacione, e deri te shkollimi i dy fëmijëve në Gjermani dhe në Angli.

Në qendër të pikëpyetjeve gjendeshin një apartament me sipërfaqe 293 metra katrorë, një dyqan 70 metra katrorë, një bodrum me sipërfaqe 65 metra katrorë dhe një zyrë më sipërfaqe 15 metra katrorë, të gjitha në një adresë pranë qendrës së Tiranës. Këto prona, sipas Komisionit të Pavarur të Kualifikimit, ishin marrë në pronësi me kontrata fiktive, pasi sipas akteve noteriale ato janë blerë nga 500 mijë lekë.

Zaganjori shpjegoi se shtëpia, dyqani, bodrumi dhe zyra në qendër të Tiranës, nuk janë blerë, por janë përfituar si trashëgimi nga familjarët e bashkëshortes së tij. Familja e saj kishte rimarrë në vitin 1994 rreth 250 metra truall në qendër të Tiranës, e cila u ishte shpronësuar në vitin 1981.  Në vitin 1997, familjarët e bashkëshortes e kishin shfrytëzuar këtë truall për ndërtimin e objektit ku gjenden pronat. Zaganjori pranoi se kontratat e kalimit të pronësisë, të nënshkruara në vitin 2001, ishin formale, por jo të paligjshme, sepse ato prona ishin të trashëguara dhe 4 familjet e trashëgimtarëve i shfrytëzonin ato prej që prej vitit 1997.

Xhezair Zaganjori është i dyti anëtar i Gjykatës së Lartë që kalon me sukses sitën e Vetting-ut, ndërkohë që janë shkarkuar tre të tjerë.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.