Zaganjori shpall datën – Më 12 dhjetor, takimi i përgjithshëm i gjyqtarëve, gati edhe KLGJ

Pas Prokurorisë, edhe Gjykata e Lartë ka shpallur zyrtarisht datën e mbledhjes së përgjithshme të gjyqtarëve ku do përzgjidhen 6 anëtarët për Këshillin e Lartë Gjyqësor.  Tre ditë pasi Komisioni i Pavarur i Kualifikimit shpalli listën e kandidatëve për këtë organ që kaluan sitën e Vetting-ut, Kreu i Gjykatës së Lartë Xhezair Zaganjori caktoi datën e mbledhjes së gjyqtarëve ku do përzgjidhen 6 anëtarët e Këshillit. Mbledhja do të bëhet më 12 dhjetor, një ditë pas mbledhjes së prokurorëve, e shpallur nga Arta Marku përpara 3 ditësh.

Të dy Këshillat, përbëhen nga 11 anëtarë, nga të cilët 5 vijnë nga jashtë sistemit, ndërsa 6 anëtarët e tjetër përzgjidhen sipas ndarjes në shkallë të gjykatave dhe prokurorive: 3 nga ato të Shkallës së Parë, 2 nga Apeli, ku të paktën njëri duhet të jetë nga organet që veprojnë në rrethe, dhe 1 nga Prokuroria e Përgjithshme në rastin e KLP-ës dhe 1 nga Gjykata e Lartë në rastin e KLGJ-së.

Konstitiumi i dy Këshillave do i hapë rrugë zgjedhjes së Prokurorit të Përgjithshëm, plotësimit të vakancave në Gjykatën e Lartë, ashtu si dhe ngritjes së dy organeve kyç të drejtësisë: Prokurorisë së Posaçme, e njohur si SPAK dhe Byrosë Kombëtare të hetimit. Të dy këto organe, ngritja e të cilëve është parashikuar në pranverën e ardhshme,  janë projektuar të kenë një rol kyç në skanimin e politikanëve e zyrtarëve të lartë ashtu si dhe të krimit të organizuar në të ardhmen. Gjithsesi, disa analistë thonë se gjithë procesi mund të pësojë ndalime apo kthime pas, pasi disa prej magjistratëve që kanë kaluar Vetting-un e do të zgjidhen në organet e reja të drejtësisë,  mund të shkarkohen nga Kolegji i Posaçëm i Apelimit, çka do sillte rinisjen e proceseve për plotësimin e vakancave.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.