Zbardhet relacioni: Si i siguroi qeveria shqiptare 7 miliardë për paketën e dytë financiare. Shkurtime nga Rruga e Arbrit, Rapiscan dhe shkollat
Qeveria ka miratuar pak kohë më parë aktin normativ për ndryshimin e buxhetit të vitit 2020 për të rialokuar fonde me qëllim përballimin e situatës së krijuar nga masat parandaluese për përhapjen e pandemisë. Në total, akti rialokon shpenzimet në masën 7 miliardë lekë dhe parashikon edhe një garanci sovrane nëmasën 15 miliardë lekë. Ky vendim plotëson atë që njihet si paketa 2 e ndihmës financiare.
Por si janë siguruar fondet?
Në relacionin e aktit normativ të depozituar në Kuvend evidentohet se fondi 7 miliardë lekësh në zërin “Kontingjenca për paketën sociale anti-COVID”, do të përdoret me vendim të Këshillit të Ministrave.
Ky fond i dedikohet financimit të masave të reja me karakter social që do të ndërmarrë qeveria, në funksion të lehtësimit e të mbështetjes së punëmarrësve dhe/ose shtresave të tjera të prekura nga pezullimi i proceseve të punës në shkallë vendi, si për biznesin e madh ashtu edhe për pjesën e mbetur të biznesit të vogël.
Po ashtu, akti reflekton një total pakësimesh prej 7 miliardë lekësh, me qëllim financimin e paketës së re anti-COVID19, pra pa kosto shtesë në buxhet, konkretisht përmes:.
– kursimeve në shpenzimet e personelit rreth 829 milionë lekë;
– kursimeve në shpenzime operative rreth 1.28 miliardë lekë, ku ndër kryesoret përmenden:
-Rreth 582 mln lekë kursime të evidentuara nga ngadalësimi i aktivitetit të institucioneve buxhetore për periudhën mars-maj.
-700 mln lekë nga kontrata vjetore e Rapiscan.
– kursimeve në investimet me financim të brendshëm rreth 4.25 miliardë lekë,
konkretisht:
-Rreth 1 miliard lekë nga projektet e shkollave;
-Rreth 1 miliard lekë nga projekti i Rrugës së Arbrit;
-Rreth 1 miliard lekë nga Ministria e Mbrojtjes;
-Rreth 800 milionë lekë nga kontratat e inceneratorëve Fier & Elbasan.
– kursimeve në investimet me financim të huaj rreth 634 milionë lekë.
Ndërkohë, në paketen e masave për përballimin e situatës emergjente anti-COVID-19 është përfshirë edhe mbështetja për biznesin, në formën e instrumentit të garancisë së re sovrane, në masën 15 miliardë lekë. Ajo do të shkojë si garanci për kompanitë që janë gjendur përballë vështirësive, jo vetëm për pagesën e pagave të punonjësve gjatë këtyre muajve, por edhe në nivel kapitali apo likuiditeti në tërësi.
“Është me rëndësi të theksohet që ndryshimet e propozuara nuk prekin deficitin buxhetor, duke treguar një kujdes maksimal për t’i destinuar dhe orientuar burimet buxhetore drejt sektorëve më emergjentë. Në vijim, qeveria do të ndjekë me kujdes maksimal ecurinë e treguesve kryesorë makroekonomikë, me objektiv primar përmirësimin e tyre gradual dhe ruajtjen e qëndrueshmërisë fiskale” evidentohet në relacion.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.