Zbardhet skema lehtësuese për tarifat e rrugës së Kombit – 100 lekë për banorët e Kukësit dhe autobusët. Kostoja nga buxheti i shtetit
Ministri i Infrastrukturës dhe Energjisë, bashkë me ministrin e Financave dhe Ekonomisë kanë prezantuar gjatë një takimi në qarkun e Kukësit, skemën lehtësuesë për tarifat e aksit Milot-Morinë.
Skema prek tre kategori: banorët e qarkut, përdoruesit e shpeshtë dhe linjat e autobusëve, dhe do të ketë një kosto shtesë në buxhetin e shtetit prej 48.5 milionë eurosh. Kjo shumë do t’i paguhet koncesionarit të Rrugës së Kombit në 30 vitet e kontratës.
“Efekti shtesë bruto në Buxhetin e Shtetit për një vit, për pesë vitet që vijnë kap vlerën rreth 1.1 milionë euro, ose afërsisht 140 milionë lekë të reja. Të gjitha zbritjet që patë ju për qytetarët e Kukësit, për linjat, për përdoruesit e shpeshtë, shkojnë në 48.5 milionë euro. Pagesa, dikush mund të thotë është simbolike, dikush mund të thotë për mua është shumë por kjo është situata e Buxhetit, kjo është situata e rrugës dhe Kryeministri ka vendosur që Buxheti i Shtetit do të marrë këtë kosto, rreth 50 milionë euro vetëm për këtë zbritje të konsiderueshme”, u shpreh Ahmetaj lidhur me efektin financiar.
PAKETA LEHTËSUESE
Banorët
- Nga tarifimi i automjeteve të banorëve të Qarkut të Kukësit do të përfitojnë vetëm automjetet e klaseve A dhe B të regjistruara në këtë qark. Tarifa për 1 kalim do të ketë një vlerë prej 100 lekësh, por kufizohet në jo më shumë se 44 kalime në muaj.
- Automjetet e mësipërme do të marrin falas pajisjen elektronike Telepass dhe përmes saj do të bëjnë rimbushjen e vlerës së kalimeve mujore. Vlera e rimbushjes do të jetë e vlefshme për t’u përdorur brenda 1 muaji nga kryerja e pagesës.
Autobusat e linjës
- 11 linjat e licencuara të autobusëve që kryejnë udhëtime nga dhe në drejtim të qytetit të Kukësit do të paguajnë një tarifë preferenciale prej 100 lekësh për çdo kalim.
Përdoruesit e shpeshtë
- Nga kjo skemë pritet të përfitojnë kryesisht bizneset nga Shqipëria dhe Kosova. Paketa parashikon për ta zbritje të tarifave në bazë të shpeshtësisë së kalimit në aksin Milot-Morinë. Nga 20-30 kalime në muaj, zbritja është 10%; nga 30-50 kalime zbritja është 20%; nga 50-60 kalime zbritja është 30%; ndërsa mbi 60 kalime në muaj zbritja është 40%. Kjo do të thotë se për një kamion që bën 30-50 kalime në muaj, tarifa për çdo kalim do të jetë 18 euro dhe jo 22.5 euro.
Grupi ndërministror ka pranuar kërkesën e bizneseve (kryesisht atyre të Kosovës), për të spostuar rinisjen e zbatimit të kalimit me tarifë përtej sezonit aktual turistik. Kështu, kalimi me pagesë në aksin Milot-Morinë do të fillojë të zbatohet duke nisur nga data 17 Shtator 2018.
“Qeveria po merr riskun më të madh. Ne po marrim rriskun financiar për të zgjidhur një problem social meqenëse Kukësi është zonë e varfër, është deri diku e izoluar, nuk ka rrugë të qënësishme alternative dhe jemi koshient për këtë. Ne mendojmë që kjo punë të fillojë në Shtator. Pra, kjo verë të kalojë duke dëgjuar edhe bizneset, pjesën e Kosovës. Nga 17 Shtatori të fillojë të aplikohet tarifa. Këto favore për biznesin janë njësoj edhe për Kosovën. Pra, nuk kemi ndjekur parim diskriminues”, u shpreh ministri Gjiknuri, duke shtuar se po vazhdon investimi për të përfunduar brenda vitit segmentin nga Kukësi në Morinë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.