Zbulohet imazhi më i detajuar ndonjëherë i Diellit – Dhe kjo mund të shpëtojë jetën tuaj! (VIDEO)
Si duket dielli? Nuk është më nevoja të verbohemi për të parë yllin më të afërt me Tokën, pasi tashmë janë zbuluar imazhet më të detajuara ndonjëherë të Dilleit. Imazhi shënon “dritën e parë” në Teleskopin Diellor të ri të Fondacionit Kombëtar të Shkencave Daniel K. Inouye (DKIST) në Haleakalā në Hawaii. Ky teleskop me bazë diellore është i gjatë 4 metra dhe tashmë mund të sinjalizojë një epokë të re për shkencën diellore, kur zyrtarisht të fillojë punën në 1 korrik 2020 dhe, duke shtuar gjithashtu shpresën se kjo do të çojë një hap përpara shkencëtarët për të kuptuar diellin dhe ndikimet e tij në planetin tonë.
Çfarë është teleskopi Diellor Daniel K. Inouye?
Ai është teleskopi diellor më i madh në botë, dhe ka hapjen më të madhe të çdo teleskopi tjetër të këtij lloji. I ndërtuar nga Observatori Kombëtar i Diellit NSF dhe i menaxhuar nga Shoqata e Universiteteve për Kërkime në Astronomi (AURA), DKIST ndodhet në majën e vullkanit prej 10 mijë këmbësh Haleakalā në ishullin e Maui, Hawaii.
Një epokë e re për shkencën diellore?
“Tani është një kohë emocionuese për të qenë një fizikan diellor,” tha Valentin Pillet, drejtor i Observatorit Kombëtar të Diellit NSF. “Teleskopi Diellor Inouye do të mund të sigurojë imazhe të shtresave të jashtme të diellit si dhe proceseve magnetike që ndodhin në to.” Rezultatet do të plotësojnë vëzhgimet e motit në hapësirë që po bëhen tani nga Parku Diellor i NASA-s, aktualisht në orbitë rreth diellit dhe nga Agjencia Europiane e Hapësirës/Orbiteri Diellor i NASA-s, i cili do të niset në Shkurt 2020.
Ajo çka do të mundësojë tjetër ky teleskop i ri është pikërisht koha e parashikimit të motit hapësinor i cili do të ndihmojë në parapërgatitjen kundrejt çdo fenomeni të mundshëm që mund të ndodhi në planet. Efekti i motit në hapësirë mund të shihet gjithashtu si një shfaqje e Aurora Borealis, të njohura edhe si dritat veriore, por ajo çka ne shohim është pikërisht mekanizmi mbrojtës i Tokës kundër motit të hapësirës.
“Ky imazh i siguruar është vetëm fillimi,” tha David Boboltz, drejtor i programit në ndarjen e shkencave astronomike të NSF dhe që mbikëqyr ndërtimin dhe funksionimet e objektit. “Teleskopi Diellor Inouye do të mbledhë më shumë informacione rreth diellit tonë gjatë 5 viteve të para të jetës së tij sesa të gjitha të dhënat diellore të mbledhura që prej kohës së Galileos në 1612”.
Në fund të fundit, ajo që shkencëtarët diellorë dëshirojnë të bëjnë falë këtyre misioneve është t’i ndihmojnë ata të kuptojnë jo vetëm marrëdhëniet midis diellit dhe Tokës, por si yjet dhe planetët në të gjithë galaktikën janë të lidhura magnetikisht mes tyre. (Forbes)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.