Zbulohet se kujt i përket skeleti 200 vjeçar, që u gjet në Rusi- Daton me kohën e Napoleon Bonaparte-s!
Një skelet, me një këmbë të zbuluar, është gjetur nga një ekip arkeologësh, dhe besohet të jetë skeleti i një prej gjeneralëve më të mëdhenj të historisë së Napoleon Bonapartes. Charles-Etienne Gudin , ka qenë gjeneral i Luftërave Revolucionare Franceze dhe Luftërave Napoleonike, i cili ka humbur jetën për shkak të një gangrene në këmbë gjatë pushtimit të Napoleonit në Rusi, në vitin 1812.
Një ekip arkeologësh francezë dhe rusë zbuluan skeletin 200-vjeçar në korrik gjatë një gërmimi në qytetin rus Smolensk, i cili shtrihet rreth 250 milje në perëndim të Moskës. Pierre Malinowski, i cili drejtoi gërmimin, ka deklaruar për CNN, se pasi zbuloi mbetjet e skeletit, ai ”fluturoi” brenda natës me një pjesë të femurit të skeletit dhe dhëmbëve brenda valixhes së tij nga Moska në Marsejë për të krahasuar ADN-në me atë të nënës, vëllait dhe djalit të gjeneralit.
“Një profesor në Marsejë kreu testime të gjera dhe ADN-ja përputhet 100%. Fatmirësisht, ja vlejti e gjithë lodhja’’- është shprehur Malinowski.
Malinowski tha gjithashtu për CNN se ai beson se Gudin do të varroset në Les Invalides, një kompleks historik i muzeve dhe monumenteve ushtarake në Paris, i cili mban gjithashtu dhe trupin e Napoleonit.
Burimi: CNN
Përshtati në shqip: Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.