“Zbutet” fatura për energjinë – Pas rritjes së prodhimit nga KESH, OSHEE shpenzon 1.36 milionë euro

Reshjet e shiut në fund të muajit shtator kanë ndikuar në uljet e importit të energjisë nga ana e Operatorit të Shpërndarjes së Energjisë Elektrike, duke zbutur faturën për blerje energjie. Sipas të dhënave zyrtare nga ky dikaster, për plotësimin e nevojave konsumatore gjatë muajit tetor janë shpenzuar 1.36 mln euro, vlerë dukshëm më e ulët se blerjet e muajit shtator.

Në total deri më tani janë blerë 18 mijë MWH energji, me një çmim mesatar prej 75.57 euro/ mwh. Pavarësisht se OSHEE mund të hapë edhe procedura të tjera gjatë muajit, tendenca për blerje energjie është në rënie të ndjeshme, duke qenë se në fillim të muajit shtator u shpenzuan 12.3 mln euro për këtë qëllim. Viti 2019 ka qenë i vështirë për operatorin e  shpërndarjes për shkak të thatësirës së tej zgjatur, çka ka sjellë që për 9-mujorin të shpenzohen në total rreth 141 mln euro.

Përmirësimi i situatës hidrike u konfirmua edhe nga KESH pak ditë më parë, i cili bëri me dije për TV SCAN se reshjet dyfishuan nivelin e prurjeve në HEC Fierzë. Sipas KESH, prurjet në këtë HEC në datën 24 shtator u regjistruan në 120 m3/s e për pasojë edhe plani i prodhimit për muajin Tetor 2019 pritet te rritet me të paktën  30% krahasuar me parashikimin.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.