Zero vdekje nga Covid në Angli! / E para herë në 14 muaj. Vë në dukje efektshmërinë e vaksinimit

Anglia, Skocia dhe Irlanda e Veriut kanë raportuar zero vdekje nga koronavirusi, duke vënë në dukje efektshmërinë e programit të vaksinimit në Mbretërinë e Bashkuar për të ndaluar përhapjen e sëmundjes.   Ishte hera e parë pa një vdekje të regjistruar në Angli, që kur nisi pandemia në Mars të vitit të kaluar.   Më shumë se 112,000 njerëz kanë vdekur që prej atëherë,  ndërkohë që u shfaq dhe varianti më i transmetueshëm.   Uellsi raportoi katër vdekje, që është edhe totali për Mbretërinë e Bashkuar.  Kjo vjen ndërkohë që Boris Johnson konfirmoi se Anglia do vazhdojë me heqjen e masave të karantinës në javën e ardhshme. Niveli i alarmit i koronavirusit në Britani është ulur në 3 nga 4, bazuar tek këshillat e ekspertëve.  Niveli 3 i alarmit nënkupton se pavarësisht se virusi është në qarkullim të përgjithshëm, transmetimi nuk po rritet në mënyrë të shpejtë.  Ekspertët thonë se rastet, shtrimet në spitale dhe vdekjet e lidhura me Covid kanë rënë, ndërkohë që vaksinat po japin efektin mbrojtës të dëshiruar, me 1/3 e të rriturve që janë vaksinuar plotësisht dhe 2/3 me një dozë.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.