Zgjedhja e Prokurorit të Përgjithshëm, Manja: Aplikimet të hapura deri nesër në orën 18:00

Kryetari i Komisionit të Ligjeve, Ulsi Manja ka përsëritur edhe një herë thirrjen për të gjithë prokurorët e sistemit që të aplikojnë për pozicionin e “Prokurorit të Përgjithshëm”, deri nesër më 12 dhjetor në orën 18:00.

Gjatë mbledhjes së grupit parlamentar të Partisë Socialiste, Manja theksoi se kandidatët duhet të kenë shkollën e Magjistraturës ose gradë shkencore në drejtësi, si dhe të kenë 15 vite punë si jurist.

“Kandidatët duhet të kenë shkollën e magjistraturës ose gradë shkencore në drejtësi. Duhet të kenë 15 vite pune si jurist, por duke qenë prokuror i sistemit i ka 15 vitet e punës. Kandidatët duhet të bëjnë një jetëshkrim, si dhe të japin pëlqimin për këtë pozicion. Ndaj thirrja është për prokurorët e sistemit që të aplikojnë deri nesër më 12 dhjetor, ora 18:00.”

Nga ana e tij, kryeministri Rama i ka bërë thirrje opozitës të shfrytëzojnë këtë moment për të arritur në një zgjedhje të mirëkuptuar.

“Kemi zgjedhur një rrugë me njoftim publik dhe me shprehje interesi për një prokuror me integritet të lartë profesional. Për sa i përket bazës ligjore është e qartë se si bëhet, por ka krijuar një situatë moskuptimi nga ana e opozitës. I drejtohem me thirrjen që ta shfrytëzojnë këtë moment, për të eksploruar çdo mundësi mirëkuptimi për të dalë me një zgjedhje të mirëkuptuar për prokurorin”, pohoi Rama.

os.de/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.