Zgjedhjet në Gjermani – Konservatorët e Merkel premtojnë punësim të plotë deri në 2025-ën
Konservatorët e kancelares Angela Merkel premtuan ndërtimin e më shumë shtëpive dhe punësim të plotë brenda 8 vitesh, kur prezantuan programin e tyre për zgjedhjet ku synojnë mandatin e katërt. Ndërkohë që ekonomia më e madhe e Europës po rritet me hapa të fortë, Kristian Demokratët e Merkel dhe Unioni Kristian Social, do të ofrojnë lehtësim të taksave dhe më shumë investime pas zgjedhjeve të 24 Shtatorit.
Aleatët mbajnë avantazh në sondazhe ndaj partisë së qendrës së majtë Social Demokrate. Në fillim të javës, ata shtuan objektivin e punësimit të plotë, që e përkufizojnë me një normë të papunësisë në më pak se 3%, deri në vitin 2025 në listën e premtimeve. Norma e papunësisë në Gjermani është aktualisht në një nivel rekord të ulët, megjithatë një nivel poshtë 3%-shit nuk është parë që prej boom-it ekonomik në mes të viteve 70’.
Partia konservatore kërkon të shtojë 15 mijë oficerë policie në 16 shtetet federale dhe të ndërtojë 1.5 milionë shtëpi gjatë mandatit tjetër. Premtimet do të sjellin mospëlqim nga Fondi Monetar Ndërkombëtar dhe Komisioni Europian, që i kanë bërë thirrje vendit që të rrisë investimet në infrastrukturë, gjë që do të ulë suficitin e llogarisë korrente, duke sjellë efekte më pozitive për vendet e tjera të rajonit. Merkel tha gjithashtu se një version më i zgjeruar i Mekanizmit Europian të Stabilitetit, mund të luajë një rol të rëndësishëm në krizat e ardhshme.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.