Zgjedhjet në Katalonjë – Garë e ashpër mes separatistëve dhe unionistëve
Katalonja do të votojë ditën e sotme, në zgjedhjet që mund t’i heqin partive pro-pavarësisë kontrollin absolut të parlamentit rajonal. Megjithatë, pritshmëritë se do të përfundojë kriza më e keqe politike në dekada janë të ulëta.
Sondazhet finale të publikuara më herët gjatë javës treguan se separatistët dhe unionistët janë në një garë të ashpër e me shumë gjasa do të përfundojë në arritjen e një qeverie minoritare nga mbështetësit e pavarësisë.
Kjo do ta mbajë vendin në pasiguri politike dhe do të rrisë shqetësimet në tregjet e kapitalit dhe ato financiarë të Europës. Megjithatë, fushata e separatistëve ka humbur pak vrull që prej muajit Tetor.
Kryeministri spanjoll Mariano Rajoy, shkarkoi qeverinë paraardhëse të Katalonjës për mbajtjen e referendumit dhe deklaratën e pavarësisë. Ai e quajti votimin e ditës së enjte si shpresën që Katalonja t’i kthehet normalitetit me një qeveri unioniste.
Një tjetër mazhorancë e mbështetësve të pavarësisë do të përkeqësonte më tej humorin e investitorëve në Katalonjë, rajon që ka një ekonomi më të madhe se Portugalia dhe është nxitës kryesor i ekonomisë Spanjolle.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.