Zgjedhjet në SHBA, Bytyçi: Të ashpra, Biden është më afër interesave të Ballkanit dhe Shqipërisë
Kandidati për president, Joe Biden duket se është më pranë interesave te Shqipërisë dhe Ballkanit në tërësi, në krahasim me Donald Trump. I ftuar në SCAN, analistit politik Enver Bytyçi komentoi mbi zgjedhjet presidenciale në SHBA duke i vlerësuar si të ashpra teksa ka vecuar Biden si kandidatin me politika më favorizuese .
Zgjedhjet amerikane pritet të kenë ndikim jo vetëm në hapësirën ndërkombëtare por edhe të Shqipërisë, pavarësisht se kush do të fitojë. Sipas analistit politik, Enver Bytyçi, kandidati për president, Joe Biden duket se është më pranë interesave te Shqipërisë dhe Ballkanit në tërësi në krahasim me Donald Trump. Në një intervistë për televizionin SCAN, Bytyçi shprehet se nuk e sheh Trumpin si përkrahës të Kosovës në dialogun me Serbinë por të kundërtën
“Interesi nacional sidomos për ne shqiptarët që kemi problem të mëdha për shtet-ndërtimin dhe shtet-formimin e plotë të Kosovës ka përparësi mbi interesin global. Duke pasur parasysh këtë, z.Biden është më afër interesave tona. Ne nuk e dimë se çfarë do të bëjë ekzaktësisht, teksa në fushatë elektorale thjesht është pozicionuar pranë shqiptarëve , ndërsa ambasadori Grenell, bashkëpunëtor i afërt i z.Trump përgjithësisht është marrë më shumë me lobin serb sidomos në shtetin e Wisconsin.”
Bytyci u ndal edhe tek fushata që u zhvillua në SHBA, duke e vlerësuar si të ashpër ku Trump ishte më i favorizuar dhe kjo sipas Bytycit për shkak të postit
“Është fushata e parë ndoshta në SHBA që zhvillohet një luftë e ashpër elektorale me retorikë të ashpër kundër njëri-tjetrit. Z.Trump ka shfrytëzuar pozicionin e tij si president i vendit, por pati edhe disavantazhe si kriza ekonomike dhe mbyllja në disa shtete të Amerikës për shkak të COVID.”
Numërimi i votave ende vazhdon në disa shtete , ndërkohë që fituesit i duhen 270 vota elektorale, ai që kryeson deri më tani është kandidati Joe Biden.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.