Zgjedhjet në Ukrainë: Partia e Zelensky rikonfirmon fitoren

Rezultatet paraprake në zgjedhjet parlamentare të Ukrainës sugjerojnë se partia e ‘Shërbëtorit të Popullit’ e Presidentit Volodimir Zelensky është në rrugë të mirë për të fituar, ndërsa ukrainasit mbështesin agjendën e reformave të tij. Komisioni Qendror i Zgjedhjeve (KQZ) tha se partia në pushtet kishte siguruar 42.35% të votave, pasi thuajse gjysma u numëruan të hënën në mëngjes. Në vend të dytë është listuar partia pro-ruse Platforma e Opozitës për Jetë, e cila siguroi 12.8%, dhe më pas partia e ish presidentit ukrainas Petro Poroshenko, Solidariteti Europian, me 8.7%.

Pjesëmarrja e regjistruar ishte rreth 49.9%, e cila është më e ulëta e regjistruar ndonjëherë në historinë e zgjedhjeve parlamentare të Ukrainës dhe hera e parë që arrin nën nivelin e 50%.

Në një deklaratë për mbështetësit e tij pas rezultateve të para të dielën në mbrëmje Zelensky tha se do të ishte i lumtur të bashkëpunonte me partinë Voice, e kryesuar nga rockstar-i Sviatoslav Vakarchuk, për bisedime rreth formimit të një koalicioni qeverisës në parlament. Një anëtare e lartë e partisë Voice, e cila aktualisht është e pesta në listë me 6.43% të votave, tha veçmas se ishte e hapur për një aleancë me forcat e reja politike, me kusht që ata të mos mbështeteshin nga oligarkët.

Por, pasi vazhdoi numërimi i votave, bisedimet rreth krijimit të një koalicioni filluan të zbeheshin pasi Shërbëtori i Popullit dukej se do të fitonte një shumicë të përgjithshme, duke e bërë atë partinë e parë që e realizon këtë shumicë në Ukrainën moderne.
Rezultatet e hershme në zgjedhje dëshmojnë se Zelensky ka gjasa të ketë konfirmuar kontrollin e tij mbi pushtetin pas fitores së tij të papritur ndaj Poroshenkos në balotazhin presidencial në prill. Zelensky, i cili fitoi famën si aktor-president në televizionin ukrainas, fitoi balotazhin e dytë të zgjedhjeve me 73.2% të votave pavarësisht se nuk kishte përvojë politike falë mesazhit të tij kundër korrupsionit dhe anti-oligarkëve. (Euronews)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.