Zgjerimi i lumit të Lanës – PD, pranë banorëve: Qeveria t’u legalizojë banesat
“Qeveria duhet të legalizojë banesat e banorëve që preken nga projekti i zgjerimit të lumit të Lanës, duke siguruar zgjidhje për këto familje”. Kjo është kërkesa e deputetëve të Partisë Demokratike, të cilët iu bashkuan banorëve, që do iu shemben banesat si pasojë e zbatimit të këtij projekti. Po ashtu, i është bërë thirrje kryeministrit Edi Rama të mos sillet si armik, por të bëhet më njerëzor.
“Zgjidhja është ajo që edhe ne e kemi deklaruar, por dhe ajo që iu është premtuar banorëve që shtëpitë e atyre që janë pa u legalizuar të legalizohen dhe të kompensohen me vlerën e tregut, ndërsa banorëve t’iu jepet kohë dhe mundësi që të gjejnë hapësirën për t’u strehuar si njerëz, jo të nxirren si kafshë nga banesat e tyre. Sot thashë jemi këtu me deputetë të Tiranës, për të sensibilizuar opinionin dhe për t’i bërë thirrje qeverisë dhe Edi Ramës: Mos u sill si armik me qytetarët e tu. Bëhu njerëzor për pak minuta, shih çfarë po bën. Janë qindra familje që po nxjerr me fëmijët jashtë, ku do shkojnë?. Iu premtua gjatë fushatës elektorale nga deputetja nga njerëzit e qeverisë se shtëpitë e tyre do të legalizohen dhe do të kompensohen, dhe sapo erdhën në pushtet kjo është përgjigjja”, shprehet Edi Paloka, deputet i PD-së.
Vetë banorët akuzuan qeverinë se po i hedh në rrugë, ndërsa theksuan se edhe ato familje që kanë dokumente të rregullta pronësie, nuk janë kompensuar.
“Banesa ime nuk është shembur ende por pritet nga çasti në çast të shembet. Siç e shihni këtu ka më shumë policë se sa banorë. Banorët janë urdhëruar që të futen brenda. Presim nga çasti në çast pa u lajmëruar pa asnjë lloj dokumenti vjen përpara derës dhe të thotë: Zotëri dil nga dera! Unë e kam të legalizuar, po ai që nuk e ka të legalizuar?”, thotë një nga banorët.
Gazetarja: Keni marrë kompensim?
“Nuk na është thënë deri sot asgjë çfarë do marrim e çfarë s’do marrim”, shprehet ai.
Nga projekti i zgjerimit të Lanës preken 153 objekte, në të cilat jetojnë 401 familje. Ndërkohë që prej disa ditësh banorët kanë kundërshtuar projektin përmes protestave dhe kërkesave të vazhdueshme për zgjidhje.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.