Zgjerimi në tregjet e huaja, AIDA: SME-të të aplikojnë në projektin Ready2Go
Bizneset shqiptare që duan të hyjnë në tregje të reja si Shtetet e Bashkuara të Amerikës, Kanada, Indi, Kili apo edhe Kamerun mund të aplikojnë në projektin Ready2go.
Agjencia Shqiptare për Zhvillimin e Investimeve bëri me dije se bëhet fjalë për projektin që mbështetet nga Bashkimi Europian dhe Agjencia Europiane e SME-ve. Por cilat janë në fakt kategoritë e ndërmarrjeve të vogla dhe të mesme që mund të aplikojnë sipas sektorëve.
Lista nis nga Agro-ushqimi, Bioteknologjia, Artizanati, Fasonë, Përpunim i Drurit dhe Mobilierisë, Industri Kreative, Energjia e Rinovueshme, Shërbimet dhe në fund edhe Mjedisi.
Sipas AIDA-s, SME-të e përzgjedhura do të kenë mundësi të bëhen pjesë e: Sesioneve të trajnimeve individuale, të cilat zhvillohen gjatë periudhës qershor-gusht 2017, sesioneve të trajnimeve në grup, të cilat do të organizohen në 5 qytete europiane si dhe takime B2B në pesë tregjet e synuara përgjatë periudhës nëntor 2017- korrik 2018.
Afati i fundit që kompanitë e interesuara kanë në dispozicion për aplikim është 17 marsi. Programi Ready2Go nuk është i vetmi që ju ofrohet si opsion sipërmarrjeve shqiptare për t’u zgjeruar në tregje të huaja dhe disi jo të zakonshme, rrjeti i EEN është një tjetër nismë së cilës i është bashkuar më herët Agjencia e Investimeve.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.