Zgjerohet sipërfaqja e varrezave të Sharrës – Bashkia hap tenderin me vlerë 126.8 mln lekë

Sipërfaqja e varrezave publikë të Sharrës do të zgjerohet. Bashkia e Tiranës ka hapur tenderin për shtimin e parcelave të reja, ku fondi i akorduar për këtë investim kap vlerën e 126.8 milionë lekëve.

Varrezat e Sharrës janë ndër varrezat kryesore të Tiranës, të cilat aktualisht kanë një numër të vogël parcelash për shërbimeve funerare, çka përbën një vështirësi të madhe sociale. Nisur nga kjo është parë si domosdoshmëri ndërhyrja për shtimin e tyre.

Referuar dokumenteve të mbërritura pranë Agjencisë së Prokurimeve Publike, projekti krahas shtimit të parcelave të reja, parashikon gjithashtu edhe rehabilitimin dhe zgjerimin e sistemit rrugor.

Më konkretisht, përmes këtij investimit synohet të realizohet rrjeti i rrugëve automobilistike, lidhjen e tyre me rrjetin rrugor ekzistues si dhe ndërtimin e shkallëve që mundësojnë aksesin për në parcela.

Në total sipërfaqja është 7.3 hektarë, ku rreth 25-30% e saj shtrihet në terren të thyer kodrinor dhe nga detajet e investimit pjesa që mund të shfrytëzohet është rreth 5 hektarë.

Rrugët dytësore që do të ndërtohet do të kenë një gjerësi 3m dhe do të mundësojnë aksesin për ritet fetare si dhe do të shërbejnë njëkohësisht edhe për automjetet dhe këmbësorët, ku për këto të fundit do të ndërtohen edhe trotuaret në njërin krah të rrugëve.

Varrezat do të rrethohen me mur rrethues betoni, ndërkohë në hyrje të rrugëve automobilistike dhe në hapësirat e reja që do t’i shtohen varrezave është parashikuar të vendosen edhe disa çezma me ujë të pijshëm. Grafiku i punimeve përfshin gjithashtu vendosjen e sistemit të ndriçimit si dhe pemëve dekorative.

Sa i takon kohëzgjatjes së kontratës, është parashikuar një periudhë kohore prej 30 javësh kalendendarike nisur nga firmosja e saj.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.