Zgjidhen emrat e rinj të KED – Përcaktohen me short anëtarët e Këshillit të Emërimeve në Drejtësi, sfidë Kushtetuesja
Në ambientet e Presidencës është hedhur të premten shorti për përzgjedhjen e 9 anëtarët e Këshillit të Emërimeve në Drejtësi për vitin 2021. Emrat janë zgjedhur mes kandidaturave të paraqitura nga Gjykata Kushtetuese, Gjykata e Lartë, Prokuroria e Përgjithshme, Gjykatat e Apelit, Prokuroritë e Apeleve dhe Gjykatat Administrative.
Emrat e përzgjedhur sipas hierarkisë janë: Marsida Xhaferllari dhe Elsa Toska nga Gjykata Kushtetuese; Ervin Pupe nga Gjykata e Lartë; Adnand Xholi nga Prokuroria e Përgjithshme; Nga Gjykatat e Apelit Astrit Kalaja dhe Elona Toro; Gjon Fusha dhe Genti Xholi nga Prokuroritë e Apelit; Rilinda Selimi nga Gjykatat Administrative.
Këshilli I emërimeve në Drejtësi merr një rol kyç veçanërisht në këtë moment, kur pritet plotësimi me anëtarë i Gjykatës Kushtetuese. Këshilli i Emërimeve në Drejtësi mblidhet sa herë është e nevojshme, për të kryer verifikimin e kushteve ligjore dhe për vlerësimin e kritereve profesionale e morale të kandidatëve për Inspektor të Lartë të Drejtësisë, si dhe të kandidatëve për anëtarë të Gjykatës Kushtetuese. Ky Këshilli shqyrton dhe i rendit kandidatët sipas meritës profesionale, kompetencë shumë e rëndësishme duke parë ngjarjet e momentit.
Kjo pasi, nëse Presidenca dhe Kuvendi si organe emërtese nuk caktojnë anëtarin e propozuar, i emëruar në detyrë është kandidati i renditur i pari nga Këshilli i Emërimeve në Drejtësi.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.