Zgjidhet kryetari i ri i Shoqatës së Investitorëve të Huaj në Shqipëri. Kush është Constantin von Alvensleben
Constantin von ALVENSLEBEN, Drejtori i Përgjithshëm i Aeroportit Ndërkombëtar të Tiranës është zgjedhur Kryetari i Ri për të drejtuar Shoqatën e Investitorëve të Huaj në Shqipëri.
Shoqata e Investitorëve të Huaj të Shqipërisë (FIAA) njofton se në datën 26 shkurt mbajti Asamblenë e saj Vjetore.
“Në këtë takim u prezantuan aktivitetet kryesore dhe programi i punës së shoqatës së bashku me sfidat kryesore të Axhendës për vitin 2020. Gjatë këtij Takimi, Asambleja e Anëtarëve zgjodhi Presidentin e FIAA-s së bashku me anëtarët e rinj në Bordin e Drejtorëve që do të drejtojnë Shoqatën në dy vitet e ardhshme” njofton shoqata.
Bordi i ri Drejtues i FIAA-s përbëhet nga Drejtorë të Lartë të kompanive të rëndësishme në vend.
Kryetari i ri i FIAA-s, Constantin von ALVENSLEBEN ka një përvojë të gjatë në menaxhimin e aeroporteve dhe aviacionit si edhe në industrinë e zhvillimit të pronave. Ai e njeh Shqipërinë dhe mjedisin e saj të biznesit që nga detyra e tij e parë si Drejtor i Përgjithshëm i TIA-s gjatë viteve 2005-2007, ku ai menaxhoi me sukses fazën fillestare në Aeroportin e vetëm në Shqipëri.
Në Shtator të vitit 2019, Constantin u zhvendos në Shqipëri përsëri, për të ndërmarrë një sfidë të re si Drejtor i Përgjithshëm i Aeroportit Ndërkombëtar të Tiranës, këtë herë në pronësi të kompanisë kineze ”China Everbright” e cila është e themeluar dhe e regjistruar në Hongkong.
FIAA numëron 80 kompani anëtare, mes tyre korporata të mëdha ndërkombëtare si Shell, Statkraft, banka të rëndësishme ndërkombëtare dhe kompani me përvojë në telekomunikacion, infrastrukturë, energji, real estate, etj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.