Zgjidhje për papunësinë – Shumë fjalë e gjithmonë më pak “para”

Papunësia është një nga shkaktarët kryesor që po largon rininë dhe jo vetëm nga Shqipëria. Edhe pse në pamje të parë fokusi dhe angazhimi i politikës duket se është në hapjen e vendeve të reja të punës dhe në krijimin e mundësive për punësim, shifrat flasin ndryshe. Për vitin që vjen do të jenë rreth 397 milionë lekë më pak të cilat do të përdoren për tregun e punës. Kjo vlerë financiare është rezultat i krahasimit mes buxhetit të vitit 2019 dhe të vitit që jemi aktualisht.

Për tregun e  punës në vitin që vjen do të përdoren rreth  1.7 miliardë lekë, nga 2.1 miliardë lekë që u përdorën një vit më parë.  Një nga shqetësimet e të punësuarve është edhe “abuzimi që bëhet në kurriz të tyre “ nga punëdhënësit. Për këtë  fenomen madje është kërkuar edhe ndryshim i kodit penal, ku të parashikohen masa ndëshkuese për abuzuesit. Por , sipas buxhetit 2019 fondi për inspektimet në punë do të ulet me rreth 5.6 milionë lekë. Kështu nga 199 milionë do të përdoren vetëm 193 milionë për vitin që vjen.

Ulja e fondit për këtë kategori nuk dihet nëse do të ndikojë edhe në uljen e numrit të inspektimeve në punë. Por fakt mbetet se cilësia e këtyre inspektimeve duhet që të rritet, në mënyre që ato të rezultojë të dobishme për këdo që i janë shkelur të drejtat në vendin e punës.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.