Zhbllokimi i tenderëve – APP, autoriteteve kontraktore: Si do vijohet me procedurat
Pas zhbllokimit të procedurave, Agjencia e Prokurimit Publik iu kërkon autoriteteve kontraktore të marrin masat për fillimin e procedurave të reja sipas nevojave si dhe për vijimin e procedurave të prokurimit, të cilat janë qenë të pezulluara.
Përmes një njoftimi me datë 16 tetor, të firmosur nga drejtoresha e Përgjithshme, Reida Kashta, për procedurat e pezulluara në Sistemin e Prokurimit Elektronik, kërkohet që nëpunësi i autorizuar i njësisë së prokurimit të bëjë shtyrjen e afatit për pranimin e ofertave.
Kjo shtyrje duhet të bëhet me aq ditë sa është diferenca kohore e mbetur nga moment i pezullimit në sistem, deri në afatin e përcaktuar për pranimin e ofertave.
Lidhur me procedurat tenderuese, që kanë qenë në proces vlerësimi duhet të vijohet me vlerësimin e tyre nga anëtarët e Komisionit të Vlerësimit të Ofertave. Ndërkohë që, në lidhje me vendimin për vijimin e vlerësimit duhet të njoftohen të gjithë ofertuesit pjesëmarrës në procedurën e prokurimit.
Pas zgjedhjeve parlamentare të qershorit, Këshilli i Ministrave vendosi pezullimin e përkohshëm të procedurave të prokurimit për vitin 2017, ndërkohë që pak ditë më parë u bë shfuqizimi i këtij vendimi, duke i hapur rrugën vijimit të procesit.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.