Zhvillimet e tregut të sigurimeve për periudhën Janar-Maj 2021 / 15.51% rritje krahasuar me periudhën e një viti më parë

AMF nëpërmjet një njoftimi të publikuar në faqen zyrtare ka bërë me dije se të ardhurat nga primet e shkruara bruto të sigurimit për periudhën janar-maj 2021 kapën vlerën 7,009 milionë lekë, ose 15.51% më shumë se në periudhën janar-maj 2020. Gjatë periudhës janar-maj 2021, numri i kontratave të sigurimit të lidhura arriti në 361,233 me një rritje prej 1.86% krahasuar me periudhën janar-maj 2020.

Tregu vazhdoi të mbetet sërish i orientuar tek sigurimet e Jo-Jetës, të cilat sollën 92.95 % të vëllimit të përgjithshëm të primeve, duke i lënë përkatësisht sigurimet e Jetës me 7.04%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 43.44% dhe primet e shkruara bruto të sigurimit të detyrueshëm zënë 56.56% të totalit të tregut.

Gjatë periudhës janar-maj 2021, dëmet e paguara bruto në tregun e sigurimeve, arritën në rreth 3,144 milionë lekë, ose 7.98% më pak se në periudhën janar-maj 2020, kryesisht për shkak të pagesës së pjesës më të madhe të dëmeve të tërmeteve vitin e kaluar. Gjatë periudhës janar-maj 2021, dëmet e paguara bruto-sigurimi motorik kapën vlerën 1,714 milionë lekë duke pësuar një rritje me rreth 51.42%, krahasuar me të njëjtën periudhë të një viti më parë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.