Zimbabve krijon ministrinë e “Whatsapp-it” – Liria e shprehjes tashmë në rrezik

Presidenti i Zimbabvesë, Robert Mugabe, njoftoi krijimin e një ministrie të re për cybersigurinë, e cila do të shërbejë si një kurth për të kapur “minjtë” që keqveprojnë në hapësirën kibernetike.

Në krye të këtij institucioni do të qëndrojë ish ministri i financave Patrick Chinamasa, për të cilin vendasit po tallen sepse kjo nënkupton që ai do të bëhet “ministri i WhatsApp-it dhe Facebook-ut”.

Megjithatë caktimi i një ministrie të veçantë ngre shqetësime për lirinë e shprehjes, aksesin në informacion dhe shtrëngimin e mesazheve në media sociale.

Zimbabveja ka nxjerrë edhe disa rregulla të reja për përdorimin e platformës Whatsapp, shërbimin e mesazheve të zotëruar nga Facebook. Grupet në këto aplikacione duhet tashmë të regjistrohen dhe administratori i grupit duhet të ketë një lejë të veçantë nga qeveria.

Një javë më parë, Chinamasa, teksa ishte ende ministër i Financave, akuzoi media sociale për ngritjen e inflacionit në vend në fund të shtatorit. Sipas tij, informacioni i rremë i shpërndarë në këto platforma solli radhë të gjata dhe mungesa të disa ushqimeve bazike nëpër supermarkete, teksa vendasit u panikuan dhe investitorët i ranë alarmit për gjendjen ekonomike.

Një zëdhënës i Mugabes tha se ministri i ri do të mund të mësojë nga eksperienca e vendeve të tjera si Kina dhe Rusia, dy shtete që janë të njohura për censurimin e mediave sociale. Sipas qeverisë, këto dy vende kanë vepruar mirë duke siguruar rendin dhe ligjshmërinë në hapësirën kibernetike.

Presidenti 93-vjeçar është bërë një meme në mediat sociale afrikane, jo vetëm në Zimbabve, sepse mbyll sytë gjatë eventeve kryesore, lexon fjalimet gabim dhe pengohet shpesh. Por arsyeja kryesore pse qeveria kërkon një censurim të këtyre mediave është shqetësimi se ato mund të përdoren për të organizuar opozitarizëm.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.