Zjarr dhe borë në SHBA – Në Kaliforni 71 viktima dhe 1000 të humbur, në New York “ngrin” ura
71 viktima dhe 1000 të humbur është deri më tani bilanci i zjarreve që kanë përpirë Kaliforninë dhe që nuk po dinë më të ndalen. Prej thuajse 10 ditësh zjarret vazhdojnë të lënë pas viktima dhe të shkrumbojnë pyje, toka e madje edhe qyteza të tëra.
Kjo është tragjedia më e rëndë e këtij lloji në historinë e Kalifornisë. Ndërkohë që zjarret janë spostuar, për shumë njerëz, sidomos në Malibu, ka qenë momenti i së vërtetës, për të zbuluar se sa ka qënë realisht dëmi në pronat e tyre.
“Kjo është shumë e egër. Unë kam jetuar në Malibu gjithë jetën time. Kam parë gjithnjë zjarre, dhe asnjëherë nuk kanë qenë të tilla. Humba shtëpinë në 2007 dhe nuk ishte aspak kështu. Kjo ishte apokaliptike, thjesht çmenduri. Kam një javë që qëndroj jashtë shtëpisë”, shprehet një qytetar, shtëpia e së cilit fatmirësisht qëndron ende në këmbë.
Por, për disa të tjerë, nuk ka më as vend se ku të kthehen. Në këtë luftë me natyrën janë mobilizuar më shumë se 2000 zjarrfikës.
Pjesa më e goditur ndërkohë është Kalifornia e veriut. E ndërkohë që Kalifornia digjet, verilindja e Shteteve të Bashkuara të Amerikës, dhe më konkretisht qyteti i mollës, New York-u është mbërthyer nga dëbora e parë, me urën e Brooklyn të ngrirë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.