Zjarrvënia, çfarë parashikon Kodi Penal? Procedohen 5 persona në disa qytete
Policia e Shtetit ka vijuar punën për parandalimin, evidentimin dhe arrestimin e personave për zjarrvënie. Në javën e fundit janë proceduar 5 shtetas dhe vijojnë hetimet për rastet të tjera.
Komisariati i Policisë në Delvinë ndaloi 2 shtetas të dyshuar si autorë të djegies së një sipërfaqe prej 80 ha kullote dhe shkurre në Malin e Muzgësë.
“Policia e Shkodrës arrestoi një person pasi dyshohet për zjarrvënie të qëllimshme. Në Lezhë është arrestuar një shtetas, pasi dyshohet se ndezi një zjarr në tokën në pronësi të tij, por zjarri ka dalë jashtë kontrollit duke djegur 30 traversa prej druri të shinave të trenit të linjës hekurudhore Shkodër-Lezhë. Në Vlorë është arrestuar i autor i dyshuar i zjarrit në fshatin Mavrovë ku është djegur një sipërfaqe toke prej 150 ha pyll, shkurre dhe një sipërfaqe tjetër prej 2.2 ha në të cilën janë shkatërruar rreth 300 rrënjë ullinj”, thuhet në njoftimin e policisë.
Ndërkohë Policia e Shtetit paralajmëron të gjithë qytetarët që ndezin zjarre të qëllimshme apo nga pakujdesia, se do të ndëshkohen ashpër sipas ligjit:
– Neni 151 i Kodit Penal, Shkatërrimi apo dëmtimi me dashje i pronës me zjarr dënohet me gjobë ose me burgim gjer në pesë vjet. Kur nga vepra penale janë shkaktuar pasoja të rënda materiale, dënohet me burgim gjer në dhjetë vjet.
Kur janë shkaktuar pasoja të rënda për jetën e shëndetin e njerëzve, dënohet me burgim nga pesë gjer në pesëmbëdhjetë vjet.
– Neni 206/a ‘Shkatërrimi me zjarr i pyjeve dhe i mjedisit pyjor’ parashikon: Shkatërrimi apo dëmtimi me dashje, me pasoja të rënda materiale, i fondit pyjor, i fidanishtes pyjore, i grumbullit pyjor ose i çdo njësie të ngjashme me to, me zjarr, dënohet me burgim nga pesë deri në tetë vjet.
Po kjo vepër, e kryer me qëllim ndryshimin e kategorisë dhe destinacionit të tokës, dënohet me burgim nga pesë deri në pesëmbëdhjetë vjet.
Po kjo vepër, kur ka shkaktuar pasoja të rënda për pronën, shëndetin ose jetën e njerëzve apo shkakton dëme të rënda dhe të zgjatura në kohë ndaj mjedisit apo zonave të mbrojtura, dënohet me burgim nga dhjetë deri në njëzet vjet.
– Neni 206/b ‘Shkatërrimi nga pakujdesia me zjarr i pyjeve dhe i mjedisit pyjor’, parashikon: Shkatërrimi apo dëmtimi nga pakujdesia, me pasoja të rënda materiale, i fondit pyjor, i fidanishtes pyjore, i grumbullit pyjor ose i çdo njësie të ngjashme me to, me zjarr, dënohet me burgim nga dy deri në pesë vjet.
Po kjo vepër, kur ka shkaktuar pasoja të rënda për pronën, shëndetin ose jetën e njerëzve apo shkakton dëme të rënda dhe të zgjatura në kohë ndaj mjedisit apo zonave të mbrojtura, dënohet me burgim nga tre deri në tetë vjet. Ministria e Punëve të Brendshme dhe Drejtoria e Emergjencave Civile u bëjnë thirrje qytetarëve të mos ndezin zjarre në zonat malore dhe ato me pyje, ndërsa në rastet kur konstatojnë zjarre të telefonojnë menjëherë në numrat e emergjencës 112 dhe 129 apo 128.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.