Zmadhohet tregu i sigurimeve – Rritja afërsisht 9% për 9-mujorin e vitit 2019

Tërmeti i nëntorit ka prishur festën e një viti të mbarë për siguruesit shqiptarë. Shifrat tregojnë se, deri në fund të shtatorit, kompanitë e sigurimeve janë rritur ndjeshëm krahasuar me vitin e kaluar dhe kanë siguruar më shumë fitime.

Mbështetur në të dhënat nga Autoriteti i Mbikëqyrjes Financiare, në fund të 9-mujorit, totali i aktiveve të tregut arriti në 34.3 miliardë lekë ose rreth 280 milionë euro. Që nga fillimi i vitit, përmasa e tregut të sigurimeve është rritur me rreth 9%.

Struktura e aktiveve dominohet kryesisht nga ato financiare, kryesisht depozita dhe tituj, që përbëjnë rreth 45% të gjithë aseteve të tregut. Sipas segmenteve, tregu dominohet nga kompanitë e sigurimit të jo-jetës, me rreth 89% të aktiveve totale.

Përveçse është rritur, këtë vit tregu i sigurimeve ka shfaqur edhe performancë më të mirë financiare. Fitimi neto i kompanive për 9-mujorin arriti në 1.1 miliardë lekë ose rreth 9 milionë euro. Krahasuar me të njëjtën periudhë të vitit të kaluar, fitimi i siguruesve është rritur me 31%.

Tërmeti i nëntorit besohet se ka sjellë një impakt të konsiderueshëm në rritjen e pagesave të dëmeve. Në një bilanc të parë, siguruesit vlerësonin rreth 12 milionë euro dëme, megjithatë ka shumë të ngjarë që vlera të jetë rritur gjatë muajit dhjetor. Kjo shumë është sa 36% e dëmeve të paguara nga kompanitë e sigurimeve për gjithë 9-mujorin e parë të vitit. Megjithatë, sipas siguruesve, dëmet nga katastrofat natyrore në pjesën më të madhe janë të risiguruara. Në këtë rast, barra direkte e dëmeve mbi kompanitë shqiptare të sigurimeve do të rezultojë vetëm në një pjesë të vogël të faturës totale.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.