Zona e re në Zall-Herr/ Miratohen fondi për shpronësimet në kuadër të Rindërtimit

Në mbledhjen e fundit, Këshilli iMinistrave ka miratuar shpronësimin, për interes publik, të pronarëve të pasurive të paluajtshme, pronë private, në funksion të procesit të rindërtimit, që do të realizohet në zonën e re për zhvillim në njësinë administrative Zall-Herr, Bashkia Tiranë.

Shpronësimi dhe shkëmbimi i pronës të bëhen në favor të Bashkisë Tiranë.

“Pronarët e pasurive të paluajtshme, që shpronësohen, të kompensohen në vlerë të plotë, sipas masës së kompensimit përkatës, që paraqitet në tabelën bashkëlidhur këtij vendimi, për pasuritë e llojit tokë “arë”, në shumën 6 milionë e 721 mijë e 869 lekë.  Vlera e përgjithshme e kompensimit, të përballohet nga zëri “Fondi për rindërtimin”, miratuar për vitin 2021” përcaktohet në vendim.

Pronarët që preken, do të kompensohen për efekt shpronësimi, pasi të kenë paraqitur certifikatën e pronësisë origjinale ose dublikatë, kartelën e pasurisë të rifreskuar, si dhe hartën treguese të regjistrimit, pranë Bashkisë Tiranë, referuar aktmarrëveshjes së lidhur.

Shpronësimi do të fillojë menjëherë pas hyrjes në fuqi të këtij vendimi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.