“Zonat e mbrojtura”, depozitohet në Kuvend projektligji. Përfitimet ekonomike që pritet të vijnë pas miratimit të tij
Është depozituar në Kuvend projektligji për zonat e mbrojtura. Ky projektligj, i cili kaloi në mbledhjen e radhës së Këshillit të Ministrave ka si qëllim të sigurojë mbrojtje të veçantë të zonave të mbrojtura dhe përbërësve të rëndësishëm të biodiversitetit dhe të natyrës.
Konkretisht, do të bëhet e mundur shpallja e zonave të mbrojtura, me rëndësi të veçantë për vlerat e tyre natyrore, ekonomike apo sociale, si pjesë e trashëgimisë natyrore dhe kulturore. Ndër të tjera në këtë projektligj synohet të krijohet lehtësim i kushteve për zhvillimin e qëndrueshëm, për informimin dhe edukimin e publikut për gjendjen dhe dobishmërinë e zonave të mbrojtura.
Pas miratimit të këtij projektligji dhe me hyrjen e tij në fuqi do të përcaktohet qartë shpallja së një zone të mbrojtur pasi të jetë realizuar dhe marrë vendimi i KKT-së.
“Risi tjetër që synon të sjellë projektligji është krijimi i Agjencisë Kombëtare të Zonave të Mbrojtura, si autoriteti shtetëror qendror i cili do të bëjë administrimin e zonave të mbrojtura. Aktualisht, kjo agjenci është krijuar, por duke qenë se nuk parashikohet në ligjin në fuqi për zonat e mbrojtura, si bazë ligjore për të ka shërbyer ligji “Për mbrojtjen e Mjedisit” i cili është një ligj kuadër për fushën e mjedisit dhe detajohet më pas në ligje sektoriale. Me anë të këtij projektligji bëhet një ndarje me qëllim administrimin më të efektshëm të të gjitha sipërfaqeve të zonave të mbrojtura, pasi projektligji parashikon edhe kurorat e gjelbra brenda sipërfaqeve administrative të bashkive”, thuhet në relacionin e projektligjit.
Në një seksion të veçantë në relacion paraqiten objektivat e shpalljes së territoreve si zona të mbrojtura, procedura e shpalljes së zonave të mbrojtura, kriteret për shpalljen e një zone të mbrojtur, zonimi i territorit të zonës së mbrojtur kombëtare, ku zonimi i brendshëm përmban:
a) zonën qendrore,
b) zonën e përdorimit tradicional;
c) zonën e rekreacionit;
ç) zonën e zhvillimit të qëndrueshëm;
d) zonën buferike.
Gjithashtu përcaktohen kategoritë e zonave të mbrojtura duke i trajtuar më pas në mënyrë më të shtjelluar të gjitha karakteristikat e menaxhimit të secilës prej tyre. Kategoritë e zonave të mbrojtura janë:
a) “Rezervë strikte natyrore/rezervat shkencor (Kategoria I)”;
b) “Park Kombëtar (kategoria II)”;
c) “Monument natyror (kategoria III)”;
ç) “Rezervat natyror i menaxhuar (kategoria IV)”;
d) “Peizazh i mbrojtur (kategoria V)”;
dh) “Zonë e mbrojtur e burimeve të menaxhuara (kategoria VI)”
e) “Park natyror”
ë) “Kurorë e gjelbër (kategoria IV)”.
Në një tjetër seksion në relacion thuhet se trajtohen zonat veçanërisht të mbrojtura si habitat i llojeve të shpendëve ujorë (Zonat “Ramsar”), “Rezervat e biosferës”, “Zonat e veçanta të ruajtjes” të rrjetit ekologjik të zonave me interes për komunitetin evropian, në të cilat përcaktohen saktë kriteret e vlerësimit e të shpalljes së zonave me interes për komunitetin evropian, si dhe objektivat e elementet të rrjetit ekologjik të zonave me rëndësi për komunitetin evropian.
Gjithashtu, specifikohen veprimtaritë që lejohen pasi të jenë pajisur me leje në zonat e mbrojtura, duke rregulluar në mënyrë eksplicite peshkimin në zonat e mbrojtura detare e bregdetare.
Ky projektligj nuk do të ketë efekte shtesë financiare në buxhetin e shtetit, pasi implementimi i tij nuk do të kërkojë financime shtesë, kjo për arsye se strukturat që do të bëjnë implementimin e ligjit në praktikë, tashmë ekzistojnë prej kohësh.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.