Zuckerberg kërkon falje – Premton kufizimin e aksesit në të dhënat personale të përdoruesve
Kreu ekzekutiv i Facebook, Mark Zuckerberg, kërkoi falje për dështimin e kompanisë në ruajtjen e të dhënave personale të 50 milionë përdoruesve dhe premtoi masa më të ashpra për të kufizuar aksesin te ky informacion.
Rrjeti më i madh në botë i mediave sociale po përballet me mbikëqyrje në Europë dhe SHBA, për akuzat se i ka ofruar akses firmës britanike Cambridge Analytica te profilet e përdoruesve, për të mbështetur fitoren e Donald Turmp në zgjedhjet e vitit 2016.
Zuckerberg tha se rrjeti social po planifikon të ndërmarrë hetime mbi mijëra aplikacione që kanë përdorur platformën Facebook, do të kufizojë aksesin në të dhëna dhe t’i japë anëtarëve një mjet që i mundëson bllokimin e aksesit në të dhënat e tyre.
Ai shtoi se është i hapur ndaj rregulloreve shtesë të qeverisë dhe të dëshmojë përballë kongresit. Aksionet e kompanisë ndaluan rënien pas komenteve të Zuckerberg, duke u mbyllur në rritje me 0.7%.
Firma humbi më shumë se 50 miliardë dollarë në vlerë tregu në vetëm 2 ditë, prej shqetësimeve nga investitorët se dështimi për të ruajtur të dhënat mund të largojë reklamuesit dhe sjellë rregullore më të ashpër.
Zuckerberg tha se nuk ka patur një numër të madh të personave që kanë fshirë llogaritë e tyre prej skandalit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.