Zv.ministrja Vodo për bilancin e dëmeve: “180 objekte janë të pabanueshme, 3 numra në dispozicion të qytetarëve”

Zëvendësministrja e Brendshme, Rovena Voda në një konferencë për shtyp ka bërë të ditur masat e ndërmarra nga Ministria e Brendshme dhe qeveria shqiptare për përballimin e gjendjes emergjente në qarqet Durrës, Lezhë dhe Tiranë.

Fillimisht zyrtarja theksoi në shërbim të qytetarëve janë në dispozicion tre numra. Ato do të shërbejnë për të marrë informacion mbi atë se çfarë do të bëhet me ta, ku duhet të marrin ndihmat, të strehohen apo të pyesin për çfarëdolloj informacioni në lidhje me banesat e tyre të dëmtuara.

Numrat janë: 069 41 14 100 ; 069 41 14 101 ; 0694114404

Për sa i përket bilancit paraprak të inspektimeve të godinave nga ekspertët e huaj dhe shqiptarë në qarkun e Durrësit deri më tani janë kontrolluar 469 objekte, ku 150 janë shpallur të pabanueshme në tre bashki, Durrës, Shijak dhe Krujë. 21 prej tyre në Durrës do të shemben – u shpreh Voda.

Zv.ministrja tha se puna e inspektimeve është e tillë që gjatë gjithë kohës informacionet përditësohen dhe të dhënat e grumbulluara në një ditë finalizohen në mbledhje të përgjithshme në orën 12 të natës. “Në ditën e nesërme do të kemi të dhëna të tjera dhe një kuadër më të plotë të dëmeve” – tha ajo.

Informacionet e deritanishme mbi objektet janë këto:

• Bashkia Durrës – 378 Objekte të inspektuara, 150 të pabanueshme, 21 për tu prishur;
• Bashkia Krujë – 46 Objekte të inspektuara, 5 të pabanueshme, asnjë për t’u prishur;
• Bashkia Shijak – 45 Objekte të inspektuara, 25 të pabanueshme, asnjë për t’u prishur;

Gjithashtu vazhdon shembja e banesave të shkatërruara nga tërmeti në bashkinë Durrës, mbi bazën e vendimeve të këshillit bashkiak, sipas vlerësimit teknik zyrtar të ekspertëve. Deri më sot, ora 18:30, janë prishur 15 objekte të shkatërruara, 8 objekte në qytetin e Thumanës dhe 7 objekte në Durrës.

900 punonjës policie janë në terren u shpreh më tej zv.ministrja, të cilët mbështesin në ruajtjen e rendit, bashkëpunojnë me grupet në terren të ekspertëve dhe punonjësve të bashkisë për akomodimin dhe informimin e banorëve si dhe ruajtjen dhe mos cenimin e lirive të tyre.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.