Zvicër, papunësia në 3% – Rekord që prej vitit 2015, rimëkëmbja vijon
Papunësia në Zvicër ka rënë pranë nivelit më të ulët në 2 vite, duke sinjalizuar se tregu i punës në vend ruan ritmin, pavarësisht forcimit të frankës zvicerane.
Norma e papunësisë në vend ra kështu pranë një rekordi minimal prej 3% gjatë qershorit, nga 3.1% që ishte në muajin paraardhës. Kjo është norma më e ulët që prej gushtit të vitit 2015.
Ekonomia e Zvicrës e varur nga eksportet mori një goditje të rëndë në Janar të vitit 2015, kur Banka Kombëtare e Zvicrës vendosi që në mënyrë surprizë të eliminojë nivelin tavan të këmbimit me Euron, duke nxitur një marshim të monedhës vendase.
Për rrjedhojë, produktet zvicerane u shtrenjtuan ndjeshëm për ata që përdorin valutë tjetër, e sidomos euron. Tashmë që kanë kaluar dy vite nga ai moment, banka qendrore në vend, vijon ta konsiderojë frankën si të mbivlerësuar dhe po përpiqet që ta dobësojë nëpërmjet normave negative të interesit dhe blerjeve në tregun valutor. Deri më tani, ekonomia e vendit ka rikuperuar tre të katërtat që prej vitit 2015.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.