Zvicra diskriminon gratë dhe vajzat – Çohen në protestë, paguhen 20% më pak se meshkujt
Pavarësisht se është një prej vendeve më të zhvilluara në botë, Zvicra mbetet mbrapa ekonomive të tjera të zhvilluara sa i përket barazisë gjinore në punë dhe pagë. Kështu, për të dytën herë në tre dekadat e fundit, gratë dhe vajzat në Zvicër janë çuar në protestë.
Protesta e së Premtes me sloganin: “Pagë, kohë respekt!”; i bën jehonë një proteste të ngjashme të vitit 1991, 5 vite përpara se akti i barazisë gjinore në Zvicër të hynte në fuqi. Ligji i vitit 1996 ndaloi diskriminimin në vendin e punës si dhe ngacmimet seksuale, por edhe mbronte gratë e vajzat nga pushimi nga puna bazuar në shtatzëni apo statusin e tyre. Më shumë se 20 vite pas nënshkrimit të aktit në fjalë, gratë dhe vajzat në vend argumentojnë se, ato paguhen më pak se meshkujt, deke kontestuar kështu mbizotërimin e mentalitetit patriarkal në punë.
Organizatorët e protestës shprehen se kanë për qëllim të nënvizojnë hendekun në paga, dhunën ndaj femrave si dhe nevojën për më shumë përfaqësim në postet kyçe. Gratë dhe vajzat në Zvicër paguhen mesatarisht 20% më pak se meshkujt. Në vitin 1991 kjo normë fiksohej në rreth 30%. Asokohe, në 1991-shin, gratë dhe vajzat bllokuan tërësisht trafikun duke u ulur në rrugë në qendrën e distriktit financiar të Zyrihut, si dhe duke u mbledhur përballë shkollave e spitaleve.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.