Zvicra i përgjigjet SHBA: Franga është rritur që prej heqjes së tavanit me euron
Zvicra nuk po manipulon valutën, thotë Jorg Gasser, sekretar i Shtetit për Çështjet Financiare Ndërkombëtare. Komentet vijnë pasi Zvicra u shtua në listën e monitorimit, në raportin gjashtëmujor të Thesarit amerikan për manipuluesit e mundshëm të këmbimit valutor.
Zvicra përmbushi 2 nga 3 kritere për t’u etiketuar si e tillë, pasi ka një sufiçit të llogarisë korrente dhe ndërmerr ndërhyrje të vazhdueshme në tregjet e këmbimit valutor.
Megjithatë, vendi nuk ka një sufiçit tregtar mbi 20 miliardë dollarë me Shtetet e Bashkuara, që është kriteri i tretë. Thesari amerikan vlerësoi se Banka Qendrore e Zvicrës ka shpenzuar 20 miliardë dollarë për rezerva në valutë të huaj, pas daljes së Britanisë nga Bashkimi Europian.
Gasser shtoi se vendi ka diskutuar mbi çështjen me administratën paraardhëse të Shteteve të Bashkuara dhe se franga është rritur me rreth 40% që prej krizës financiare.
Duke qenë se valuta zvicerane shihet si një aset i sigurt nga investitorët, presionet për rritje do të qëndrojnë për shkak të pasigurive në lidhje me Brexit dhe zhvillimet e tjera gjeopolitike.
Zyrtarët thonë se ka të bëjë me shumë me zhvlerësimin e euros dhe se influencat te valuta europiane janë të limituara, pasi politikat monetare zhvillohen në Frankfurt dhe jo në Zyrih.
Megjithatë, raporti i Thesarit amerikan theksoi se Zvicra mund të përdorë mjete monetare më tradicionale, si normat e interesit, për të reduktuar ndërhyrjet në valutë dhe presionet deflacioniste.
Banka Qendrore e Zvicrës ka caktuar një normë interesi për depozitat negative në -0.75%. Në 2015-ën, banka hoqi tavanin 3-vjeçar të frangës në 1.20 kundër euros, gjë që nxiti rritjen gjigante të valutës.
Kjo erdhi prej prezantimit të programit të lehtësimit sasior të Bankës Qendrore Europiane, gjë që do ta bënte mbajtjen e tavanit me euron tejet të kushtueshëm. Në fillim të vitit 2008, euro qëndronte në 1.6554 kundër frangës, duke rënë në 2015-ën në 0.98, kur u hoq tavani.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.