Zvicra prezanton kartëmonedhën më të sigurt në botë
Banka Kombëtare e Zvicrës ka prezantuar të mërkurën kartëmonedhën e re prej 20 frangash, për të cilën zëvendëspresidenti i bankës shprehet se është më e sigurta në botë.
Kartëmonedha që do të hyjë në qarkullim më datën 17 Maj ka ngjyrë të kuqe dhe ka për motiv dritën dhe kulturën. Ajo është e përbërë nga letra e pambukut dhe nga një shtresë e brendshme prej polimeri.
“Paraja 20 franga fokusohet në krijimtarinë e Zvicrës, duke nxjerrë në pah skenën vibrante kulturore dhe artistike të vendit në një sërë fushash”, tha gjatë ceremonisë Zurbruegg.
Njëzetëshja pason prezantimin e bërë gjatë vitit të shkuar të kartëmonedhës 50-frangëshe, e cila u emërtuar kartëmonedha e vitit 2016 duke mundur 18 konkurrentë.
Ajo ka 15 tipare sigurie, mes tyre një glob që ndryshon ngjyrë, një hartë ngjyrë argjendi e Zvicrës dhe një kryq që me të lëvizur këndin e shikimit shndërrohet në flamurin kombëtar.
Në përgjigje të një pyetjeje nëse kjo është kartëmonedha më e sigurt në botë, Zurbruegg tha duke qeshur: “Do të thoja se kjo është më e sigurta”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.