Zyrtarë dhe ekspertë të OECD takim në Tiranë – Diskutojnë për politikat mbi konkurrueshmërinë dhe investimet

Organizata për Bashkëpunim Ekonomik dhe Zhvillim, OECD organizoi sot në Tiranë një mbledhje koordinuese në lidhje me politikat që nxisin konkurrueshmërinë në Europën Juglindore, e përqendruar në ekonominë shqiptare.

Të pranishmit në këtë takim diskutuan në lidhje me progresin e bërë dhe reformat që duhet të ndërmerren në 15 fusha kryesore të politikave, që përfshijnë ndër të tjera: politikat fiskale dhe tregtare, politikat e konkurrueshmërisë dhe investimeve, aksesin në financë, inovacionin etj.

Në takim ishin të pranishëm, drejtuesja e OECD-së për Europën Juglindore, Marzena Kisielewska, ekspertë të kësaj organizate, përfaqësues nga Agjencia Shqiptare e Zhvillimit të Investimeve (AIDA) dhe organizatave të tjera shtetërore, si edhe ekspertë nga organizatat jo-qeveritare.

Një theks i rëndësishëm gjatë takimit iu dha suksesit të arritur nga Shqipëria në tërheqjen e investimeve të huaja, të cilët arritën rekordin historik në vlerën 1 miliard euro. Gjithashtu në fokus të takimit ishte edhe mbledhja e të dhënave për raportin e përvitshëm të OECD-së.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.