Zyrtare/ Eurovision 2020 nuk do të zhvillohet. Çfarë do të ndodhë me garuesit e këtij viti?

Shpërthimi  i coronavirus i ka dhënë efektet e veta në shumë drejtime, si edhe në shumë evente. Më së fundmi është vendosur se nuk do të zhvillohet Eurovision-i për këtë vit, në të cilin Shqipëria përfaqësohej nga këngëtarja Arilena Ara, me këngën “Shaj”.

Eventi do të zhvillohej në Roterdam, me 16 maj. “Ne, si miliona prej jush në të gjithë botën, jemi jashtëzakonisht të trishtuar që nuk mund të zhvillohet në maj” thanë organizatorët në një deklaratë zyrtare. Edhe më parë, qeveria holandeze kishte ndaluar tubimet e mëdha publike, në përpjekje për të ndaluar përhapjen e coronavirus.

“Shëndeti i artistëve, stafit, tifozëve dhe vizitorëve, si dhe situata në Holandë, Europë dhe në botë, është në zemër të këtij vendimi” tha ekipi i Eurovision-it. Për 64 vite, Eurovision-i ka bërë bashkë njerëz në të gjithë Europën. Organizatorët janë shprehur se janë duke zhvilluar bisedime për mënyrën se si do të organizohet në vitin e ardhshëm.

Ende nuk dihet nëse fituesit apo garuesit e këtij viti, mes të cilëve edhe Arilena Ara, do të jenë të pranishmit e vitit të ardhshëm. Organizatorët e Eurovision-it thanë për BBC se çështja do të diskutohej dhe se një vendim i tillë, do të komunikohet në një moment të dytë.

Burimi: BBC

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.