Zyrtare/ Shqipëria rihap garën ndërkombëtare për Aeroportin e Vlorës! Balluku: Fituesi në janar, shpresojmë një konsorcium të huaj

Shqipëria ka rihapur garën ndërkombëtare të oferatave për ndërtimin dhe operimin e Aeroportit të Vlorës. Ministrja e Infrastrukturës Belinda Balluku tha se gara do të jetë e hapur deri me 23 dhjetor të këtij viti.

Deri në këtë datë, kompanitë duhet të dorëzojnë ofertat, të cilat më pas do të shqyrtohen për njëperiudhë 2 javore për të vijuar më pas me shpalljen e fituesit në mesin e muajit janar. “Shpresojmë një konsorcium ndërkombëtar të denjë për aeroportin e shqiptarëve” tha Balluku.

Gara për aeroportin e Vlorës u shpall fillimisht në 19 dhjetor të vitit 2019 por për shkak të pandemisë u detyrua pezullimi i tij.

Lajmi i rihapjes së garës u bë i ditur edhe nga kryeministri Edi Rama në ceremoninë e hapjes së garës ndërkombëtare për ndërtimin e parkut fotovoltaik të Karavastasë pak ditë më parë.

Situata e krijuar nga përhapja e koronavirusit të ri, duket se ka ndikuar edhe në garën ndërkombëtare për ndërtimin e aeroportit të Vlorës. Pas 2 shtyrjeve të mëparshme, në mars të këtij viti gara u pezullua, ndërkohë që nuk dihej se kur do të rihapej për kompanitë e interesuara.

Aeroporti i Vlorës është një prej projekteve më të rëndësishme infrastrukturore, përmes të cilit qeveria synon të ndikojë në uljen e çmimit të biletave.

Ndërtimi parashikohet të kryhet përmes një partneritetit publik-privat, ku fillimisht kompania fituese do të duhet të kryejë investimin , ndërsa do të ketë të drejtën e operimit për një periudhë 35-vjeçare.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.