Zyrtari mjekësor i BE krahason vaksinën e Sputnik V me ‘ruletën ruse’: ‘Ende nuk ka të dhëna të mjaftueshme’

Kreu i bordit menaxhues në rregullatorin e ilaçeve të BE-së paralajmëroi kundër autorizimeve kombëtare emergjente të vaksinës Sputnik V të Rusisë, duke krahasuar idenë me “ruletën ruse”.

Javën e kaluar Agjencia Europiane e Barnave me bazë në Amsterdam filloi një rishikim të vaksinës Sputnik V, një hap kryesor drejt miratimit si doza e parë jo-perëndimore që do të përdoret në bllokun e 27 vendeve.

Hungaria tashmë ka aprovuar Sputnik V dhe ka filluar ta përdorë atë si pjesë e përhapjes së vaksinave, ndërsa Republika Çeke dhe Sllovakia gjithashtu kanë porositur doza dhe thonë se nuk do të presin miratimin e EMA.

I pyetur në lidhje me perspektivën që Austria të ndërmarrë të njëjtin hap, kryetarja e bordit të menaxhimit të EMA Christa Wirthumer-Hoche i tha transmetuesit ORF të Austrisë: “Është disi e krahasueshme me ruletën ruse.”

“Unë do të këshilloja me forcë kundër një autorizimi kombëtar emergjence,” tha ajo, duke treguar faktin se nuk kishte ende të dhëna të mjaftueshme të sigurisë për ata që tashmë kanë marr vaksinat.

“Ne mund të kemi Sputnik V në treg në të ardhmen, kur të kemi ekzaminuar të dhënat e nevojshme,” tha ajo, duke shtuar se vaksina duhej të përputhej me kriteret europiane për kontrollin e cilësisë dhe efikasitetin.

Kancelari austriak Sebastian Kurz u takua me zyrtarin e lartë rus të ngarkuar me marketingun e Sputnik V dhe kishte theksuar më parë se prokurimi i vaksinave nuk duhet t’i nënshtrohet “luftimeve gjeopolitike”.

Kurz ka thënë megjithatë se Austria do të presë miratimin e EMA para se të përdorë vaksinën.

Rusia ka thënë se është e gatshme të sigurojë doza për 50 milion europianë sapo Sputnik V të marrë dritën jeshile.

Moska e ka shtyrë Europën të ndjekë drejtimin e dhjetëra vendeve në botë që kanë aprovuar Sputnik, por Brukseli ka qenë i kujdesshëm që Kremlini do të përdorë vaksinën si një mjet me fuqi të butë.

BE, e cila është kritikuar për një fillim të ngadaltë të vaksinimit masiv të saj, deri më tani ka autorizuar tre vaksina: Atë Pfizer / BioNTech, Moderna dhe vaksinën AstraZeneca / Oxford.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.