‘Zyrtarisht’ vjeshtë?! – SHMU publikon parashikimin e motit për fundjavën

Shërbimi Meteorologjik Ushtarak informon se tashmë jemi në stinën e vjeshtës dhe ajo që pritet tani është moti i paqëndrueshëm dhe reshjet e shiut.

Sipas njoftimit ditën e Shtunë parashikohet mot me vranësira mesatare dhe të dendura si dhe intervale të shkurtra me diell. Reshje shiu të herëpashershme përgjatë gjithë ditës ndërsa gjatë pjesës së parë të 24-orëshit reshjet do të jenë me intensitet mesatar në formën e shtrëngatave e rrebesheve afatshkurtër kryesisht në veri dhe qendër.

SHMU bën me dije se gjatë orëve të pasdites intensiteti i reshjeve bie dhe bëhen të herëpashershme dhe të dobëta kryesisht përgjatë relieveve kodrinore e ato malore ndaj edhe për ditën e Diel moti parashikohet përsëri i paqëndrueshëm por me një përmirësim të lehtë.

Sipas informacionit të publikuar vranësirat do të jenë mesatare deri të dendura por do të ketë edhe alternime kthjellimesh të herëpashershme të cilat do të shoqërohen me reshje shiu të vazhdueshme me intensitet deri mesatar në formën e shtrëngatave apo rrebesheve lokale dhe afatshkurtër.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.